قوباد تاڵەبانی: بۆ نەهێشتنی رۆتین و گەندەڵی پێویستمان بە ئەزموونی هیندستانە

PUKMEDIA

قوباد تاڵەبانی و سکرتێری وەزارەتی دەرەوەی هیندستان

قوباد تاڵەبانی جێگری سەرۆکی ئەنجومەنی وەزیران، پێشوازیکرد لە عوساف سەعید سکرتێری وەزارەتی دەرەوەی هیندستان و لە کۆبوونەوەی نێوانیان تاوتوێی چۆنییەتی پەرەپێدانی پەیوەندییەکانی نێوان هەرێم و وڵاتی هیندستان کرا.

لە کۆبوونەوەکەدا کە رۆژی سێ شەمە 21ی شوباتی 2023 لە هەولێر بەڕێوەچوو و تیایدا دابان شەدەڵە جێگری بەرپرسی فەرمانگەی پەیوەندییەکانی دەرەوەی هەرێم و باڵیۆز و کونسوڵی هیندستان ئامادەی بوون، باس لە چاکسازی و پرۆسەی بە ئەلیکترۆنیکردنی دامەزراوەکانی حکومەت کرا.

لەمبارەیەوە قوباد تاڵەبانی ئاماژەی بە پێشکەوتنەکانی هیندستان لە بواری حکومەتی ئەلیکترۆنی کرد و رایگەیاند: "هەرێمی کوردستان بۆ سەرخستنی هەنگاوەکانی پرۆسەی حکومەتی ئەلیکترۆنی لەپێناو نەهێشتنی رۆتین و گەندەڵی پێویستیی بە کەڵکوەرگرتن لە ئەزمونی دەوڵەمەندی هیندستان هەیە".

لە بەشێکی دیکەی کۆبوونەوەکەدا قوباد تاڵەبانی باسی لە پێویستیی رێکخستنەوە و بە ئەلیکترۆنیکردنی سیستمی بانکی کرد و  لەم چوارچێوەیەشدا کە وڵاتی هیندستان زۆر پێشکەوتوون، داوای هەماهەنگی لێکردن.

سکرتێری وەزارەتی دەرەوەی هیندستانش لە کۆبوونەوەکەدا ویستی وڵاتەکەی بۆ پەرەپێدانی پەیوەندییەکانی لەگەڵ هەرێمی کوردستان دەربڕی و راشیگەیاند: "ئامادەن بۆ هاوکاریکردنی حکومەتی هەرێم لەڕووی گواستنەوەی ئەزمونی ئەو وڵاتە بۆ سەرخستن و بەرەوپێشبردنی حکومەتی ئەلیکترۆنی".
PUKMEDIA