ستران عەبدوڵڵا: میدیاکارانی یەکێتی لە گەڤ و هەڕەشە ناترسن

مەکتەبی راگەیاندن

ستران عەبدوڵڵا پێشوازی لە رۆژنامەنوس ڤگێر نهێلی دەکات

ئەمڕۆ 21/2/2023  ستران عەبدوڵڵا لێپرسراوی مەکتەبی راگەیاندن پێشوازی لە رۆژنامەنوس ڤگێر نهێلی کرد، کە لەمەودوا لە دەنگی گەلی کوردستان، لە ناوەندی رادیۆکە، درێژە بە خزمەت و خەباتی میدیایی خۆی دەدات. 

لێپرسراوی مەکتەبی راگەیاندن وێڕای بەخێرهاتنی، پشتیوانیشی بۆ ڤگێر نهێلی دووپات کردەوە  و ئاماژەی بەوە کرد:  یەکێتیی نیشتمانیی کوردستان دەستبەرداری هەڤاڵ و کادرە ئازا و ئازادەکانی خۆی نابێت و پشتیوانییان لێ دەکات.

وتیشی: میدیاکارانی یەکێتی پەیامی یەکێتی و راگەیاندنێکی نیشتمانی و دیموکراتی دەپارێزن و بەوپەڕی بەرپرسیارێتی و ئازایەتییەوە درێژە بە کاروانی میدیایی خۆیان دەدەن و لە گەڤ و هەڕەشە ناترسن و بە دڵنیاییەوە رێی راستی راگەیاندنی پەیامداری کوردستان و دیموکراتی دەمێننەوە .

هاوکات ئەندامانی مەکتەب کە ئامادەی دیدارەکە بوون پشتیوانی خۆیان بۆ کار و خزمەتی لەمەودوای ڤگێر دەربڕی و ئامادەی هاوکاریکردنی بوون بۆ سەرکەوتنی لە ئەرکە نوێکەیدا .

ئەمەش لاکاتێکدایە ڤگێر نهێلی پێشتر لە رادیۆی بادینان بەرنامەی هەبووە و ماوەیەکە بە بیانووی جۆراو جۆر و رەخنەوە، بەبێ هیچ پاساوێکی یاسایی ئاسایشی دهۆک چەند جارێک هەڵیانکوتاوەتە سەر ماڵەکەی و ویستوویانە دەستگیری بکەن.

PUKMEDIA