وەزیری رۆشنبیری بۆ كەناڵەكانی راگەیاندن: پەخشکەری پەیامی ئاشتی بن

پەڕەری تایبەتی وەزیری رۆشنبیری لە فەیسبوک

وەزیری رۆشنبیری و لاوانی حکومەتی هەرێمی کوردستان

حەمەی حەمەسەعید وەزیری رۆشنبیری و لاوانی حكومەتی هەرێمی كوردستان لە پەیامێکدا ئیدانەی هەرجۆرە گوتارێكی نەیار بە دۆزی رەوای گەلی كوردستان و كیان و قەوارە دەستوورییەكەی هەرێمی كوردستان دەكات و دەڵێت، "داواكارین كەناڵەكانی راگەیاندنی هەرێمی كوردستان، پەخشكەری گوتاری لێبوردەیی و پێكەوەژیانی ئاشتیانە بن، خۆیان لە بڵاوكردنەوەی گوتاری چاندنی رق و پەرتەوازەیی بپارێزن".

دەقی پەیامەکەی وەزیری رۆشنبیری

ئیدانەی هەرجۆرە گوتارێكی نەیار بە دۆزی رەوای گەلی كوردستان و كیان و قەوارە دەستوورییەكەی هەرێمی كوردستان دەکەین، پێویستە هەموو لایەك بە تایبەتی میدیاكانی عێراق، لە چوارچێوەی بنەما چەسپاوەكانی دەستوور پەیامی میدیاییان دابڕێژنەوە و پابەندی بنەمای سیستمی فیدراڵی بن، كە لە دەستووردا چەسپێندراوە و گەلانی عێراق دەنگیان پێداوە.

مایەی نیگەرانیمانە ڕۆژنامەیەكی سەر بە دەوڵەت، بە بێ لەبەرچاوگرتنی واقیعی یاسایی و دەستووری هەرێمی كوردستان، بابەتێكی دژ بە گیانی بەیەكەوەبوون و بنەما چەسپاوەكانی دەستووری عێراق و سیستمی فیدراڵی بوروژێنێت، بڵاوكردنەوەی ئەو جۆرە بابەتانە دەچنە چوارچێوەی تێكدانی ئاسایشی كۆمەڵایەتی و بەیەكەوەژیانی ئاشتیانە و هەوڵدانە بۆ چاندنی گیانی ڕق و نكوڵیكردن، هەروەها هەوڵێكی نەزۆكە بۆ دژایەتیكردنی كیانی دەستووری هەرێمی كوردستان.

لێرەوە داواكارین لە لایەنە پەیوەندیدارەكانی حكومەتی عێراق, ڕێگر بن لە بڵاوكردنەوەی گوتاری دژ بە بنەما دەستوورییەكان، سیستمی فیدراڵی عێراق و كیانی دەستووری و یاسایی خەڵكی كوردستان، كە بەری ڕەنج و تێكۆشانی گەلی كوردستانە دژ بە دیكتاتۆری و لە پێناویدا خوێنی سەدان هەزار شەهید ڕژاوە.

هەروەها داواكاریشین كەناڵەكانی ڕاگەیاندنی هەرێمی كوردستان، پەخشكەری گوتاری لێبوردەیی و پێكەوەژیانی ئاشتیانە بن، خۆیان لە بڵاوكردنەوەی گوتاری چاندنی ڕق و پەرتەوازەیی بپارێزن، پەنا نەبەنە بەر وەرگێڕانی گوتاری ناحەزانی كیانی دەستووری و شەرعیی هەرێمی كوردستان و لە ڕێگەی پەیامەكانیانەوە پارێزەری بەری خوێنی شەهیدان بن.  بەخشی.

وەزیری ڕۆشنبیری و لاوان
حكومەتی هەرێمی كوردستان