ئەمریكا نیگەرانی "ئازادی"ی هەرێمە و ئاسایشی پارتیش "بەرتەسكی" دەكات

PUKMEDIA

رێگری ئاسایشی پارتی لە خۆپیشاندەران

دوای دوو رۆژ لە هۆشداری و نیگەرانیەكانی ئەمریكا سەبارەت بە بەرتەسكردنەوەی ئازادی رۆژنامەنوسی و راگەیاندن لە هەرێم،  ئاسایشی پارتی لە هەولێر بەجلوبەرگی مەدەنی و رەسمیەوە رێ بە رۆژنامەنوسان نادەن روماڵی ناڕەزایی كچانی بەشە ناوخۆییەك بكەن و پەلاماریشیان دەدەن.

ئێرڤن هیكس كونسوڵخانەی گشتی ئەمریكا لە هەولێر رایدەگەیەنێت: "ئەمریكا نیگەرانە لە پاشەكشێی مافەكانی مرۆڤ و ئازادی رادەربڕین و راگەیاندن و مافی پێكهاتەكان و ژنان لە هەرێمی كوردستان" و دەڵێت: "ئەمریكا پێیوایە پێویستە رۆژنامەنووسان و ناوەندە میدیاییەكان رێگەیان پێبدرێت هەواڵەكان بگەیێنن بەبێ ترس لە چاوترساندن و هەراسانكردن و تۆڵە لێسەندنەوە". بەڵام ئاسایشی پارتی لە هەولێر "چاوترساندن و هەراسانكردن"ی بەكارهێنا و لە دژی ئازادی كاری رۆژنامەنوسی مامەڵەی كرد.

رۆژنامەنووسێكیش بە PUKMEDIA ی وت: "ئاسایشی پارتی بە جلو بەرگی مەدەنییەوە لە بەردەم بەشەناوەخۆیی كچان لە هەولێر جگە لەرێگریكردن، هێرشیان كردەسەر رۆژنامەنووسان"، هەروەها بڕیار محەمەد پەیامنێری پۆلەتیك پرێس بە PUKMEDIA وت: "بەرپرسانی بەشە ناوخۆییەكانیش رێگەیان نەدا رووماڵی ناڕەزاییەكان بكەین".

نەبوونی خزمەتگوزرایی بەشی ناوخۆیی كچانی لە هەولێر هێنایە سەرشەقام و گردبوونەوەی ناڕەزاییان دەستپێكرد، ژمارەیەك ئاسایشی هەولێریش بە جولوبەرگی مەدەنی و رەسمییەوە رێگری لە رۆژنامەنوسان دەكەن كە رووماڵی ناڕەزایی خوێندكاران بكەن.

دواینیوەڕۆی 19/2/2023 بەهۆی نەبوونی خزمەتگوزاری لە شوینی مانەوەیاندا خوێندكارانی بەشە ناوخۆی كچان لە زانكۆی پۆلەتەكنیكی هەولێر  بۆ دەربڕینی ناڕەزایی گردبوونەوە.

بەوتەی خوێندكارەكان لە بەشە ناوخۆییەكان "كێشەی نەبوونی كارەبا و ئاوی گەرمییان هەیە،  چەندینجار لایەنەكانیان ئاگادار كردۆتەوە، نەگوێیان لێدەگیرێت و نە كێشەكانیان بۆ چارەسەر دەكرێت".

خوێندكاران بۆ PUKMEDIA ئاماژەیان بەوەدا: "داوای ئاوی گەرم و سوتەمەنی دەكەین، بەڵام بۆمان دابین ناكەن و بەهۆی نەبوونی ئاوی گەرمەوە زۆربەی خوێندكاران توشی نەخۆشی بوون و بەڕێی نەخۆشخانەوەن"، "ئەو كێشانە تازە نین و چەندین جار بەڵینی چارەسەریان پێداوین، بەڵام تائێستا بۆیان چارەسەر نەكردوین".

ئەمریكا نیگەرانە لە پاشەكشێی مافەكانی مرۆڤ و ئازادی و پێكهاتەكانی هەرێم

PUKMEDIA