بەڵێنەكان بۆ دەربەندیخان جێبەجێدەكرێن

ئاژانسەكان

قەزای دەربەندیخان

بەڵێنەكانی بەڕێوەبەری نوسینگەی جێگری ئەنجومەنی وەزیران بۆ خۆپیشاندەرانی دەربەندیخان دەكەوێتە بواری جێبەجێكردنەوە و بڕیاریشە ئەمڕۆ خۆپیشاندان لەقەزاكە كۆتایی بێت.

سلێمان محەمەد قائیمقامی دەربەندیخان بەسایتی رەسمی یەكێتیی نیشتمانیی كوردستان PUKMEDIA ی راگەیاند: "بەسوپاسەوە بەڕێوەبەری نوسینگەی جێگری ئەنجومەنی وەزیران بەدەم داواكاریی خۆپیشاندەرانەوە هاتن و بەشێكی زۆری لەداواكارییەكانیان كەوتوونەتە بواری جێبەجێكردنەوە".

" ئەمڕۆ بەڵێنەكانی بەڕێوەبەری نوسینگەی جێگری ئەنجومەنی وەزیرانمان گەیاندە خۆپیشاندەران و بڕیارە كۆتایی بەخۆپیشاندەرانەكان بهێنرێت، لەگەڵ ئەوەشدا هەرگیز رێگری ناكەین لەدەنگی ئازادو دەربڕینی ناڕەزاییەكان بەشێوەی مەدەنی" سلێمان محەمەد وادەڵێت.

دەشڵێت:" رۆژانە چەند سەعاتێك كارەبای نیشتمانی بۆ دانیشتوانی سنوورەكە زیادكراوە و بڕیاریشدراوە تا كۆتایی ئەم مانگە پڕۆژەی ئاوی دەربەندیخان بكەوێتەوە كارو لەرۆژانی داهاتووشدا رێكارەكانی دەستپێكردنەوە و پێدانی سولفە بە بەڵێندەر تەواو دەكرێن و دەستبەكارەكانی بكاتەوە".

دوێنێ سێ شەممە بەڕێوەبەری یەكە ئیدارییەكانی دەربەندیخان لەگەڵ بەڕێوەبەری نوسینگەی قوباد تاڵەبانی جێگری ئەنجومەنی وەزیران كۆبوونەوە و بەڵێنی چارەسەری كێشەكانی سنوورەكە دراو بەشێك لەداواكارییەكانی خۆپیشاندەران كەوتنە بواری جێبەجێكردنەوە.

PUKMEDIA