یەكێتی پیلانێكی شۆڤێنی لە كەركوك پوچەڵدەكاتەوە

PUKMEDIA

زەوییە كشتوكاڵییەكانی كەركوك

یەكێتیی نیشتمانیی كوردستان پیلانێكی شۆڤێنی لە كەركوك پوچەڵدەكاتەوە و ئەو زەویانەی لەلایەن فیرقەیەكی سوپای عیراقەوە هەوڵی داگیركردنیان دەدرا رێگری لێكرد و گەڕاندییەوە بۆ خاوەنەكانیان كە كورد و توركمانن.

لەوبارەیەوە ئاڤێستا شێخ مەحمەد لێپرسراوی مەڵبەندی 18 ی رێكخستنی رۆژهەڵاتی كەركوك بە سایتی رەسمی یەكێتیی نیشتمانیی كوردستان PUKMEDIA ی راگەیاند: "پاش ئەوەی لەلایەن ژمارەیەك جوتیاری كورد و توركمان لە كەركوك ئاگادار كراینەوە كە فیرقەیەكی سوپای عیراق هەڵیانكوتاوەتە سەر زەوییەكانیان لە گوندی تۆپزاوەی سەر بە پارێزگای كەركوك و داگیریان كردووە، ئێمەش بەدەم داواكارییەكانیانانەوە چووین و لەڕێگای خالید شوانی وەزیری دادی عیراق لە پشكی یەكێتی كێشەكەمان بۆ چارەسەر كردن".

وتیشی: "یەكێتیی نیشتمانیی كوردستان پارێزەری مافی سەرجەم پێكهاتەكانی كەركوكە و رێگا بە هیچ عەرەبێكی شۆڤێنی نادات بیری تەسكی شۆڤێنی خۆی لە شاری كەركوك جێبەجێ بكات و زوڵم لە پێكهاتەكانی دیكەی كەركوك بكات".

"ئەو زەویانەی كە فیرقەكەی سوپای عیراق ویستوویەتی دەستیبەسەردا بگرێت لەلایەن جوتیارە كورد و توركمانەكانەوە تاپۆی رەشیان هەیە و بە بڕە پارەیەكی زۆر پڕۆژەیان لەسەر دروستكردووە و داهاتێكی گرنگی رۆژانەیانە" ئاڤێستا شێخ مەحمەد وادەڵێت.

ئەو زەویانەی كە فیرقەكەی سوپای عیراق ویستوویەتی داگیریان بكات بە سەدان دۆنم زەوی مەزەندە دەكرێت و لەدوای ساڵی 2003 ەوە بەدەست خاوەنە كورد و توركمانەكانیانەوەیە، هەرچەندە لەلایەن ئەو فیرقەیەی سوپای عیراقەوە هەوڵی داگیركردنی ئەو زەویانە دەدرا، بەڵام بەهەوڵی یەكێتیی نیشتمانیی كوردستان ئەو پیلانە پوچوڵكرایەوە و یەكێتیش هەموو پشتیوانییەكی بۆ ئەو جوتیارانە دەربڕی و لە ئێستادا جوتیاران لەسەر زەوییەكانی خۆیان بەردەوامن لە كاركردن.

PUKMEDIA