سەرۆک بافڵ: پەیوەندییەکانمان لەگەڵ پارتی کۆمۆنیستی چین درێژەپێدەدەین

نوسینگەی رۆژنامەوانی سەرۆکی یەکێتی

کۆبوونەوەی وەفدی یەکێتی و وەفدێکی كۆمارى میللی چين

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد له‌ وەفدێکی كۆمارى میللی چين به‌ سه‌رۆكايه‌تی ژوو ‏رووى، یاریدەدەری وەزیر لە فه‌رمانگه‌ى په‌يوه‌ندييه‌كانى ده‌ره‌وه‌ى کۆمیتەی ‏ناوەنديی پارتى كۆمۆنيستى چین.

له‌ ديدارێكدا كه‌ رەفعەت عەبدوڵا، بڕیاردەری دەستەی کارگێڕی و د.میران محەمەد، ئەندامی مەکتەبی سیاسی و سەركەوت محەمەد غەفوور، لێپرسراوی بۆردی پەیوەندییەكانی دەرەوەی یەکێتی و چوو وەی، باڵیۆزی چین لە عیراق و لیو زین یونگ، کونسوڵی چین لە هەرێم و ژمارەیەک لێپرسراو و راوێژکاری حزبی کۆمۆنیستی چین ئامادەبوون، گفتوگۆ لەبارەی دۆخی هەرێم و عیراق و پەیوەندییەکانی نێوان هەردوولا کرا و جەخت لە بەردەوامی هەماهەنگی و هاریکارییەکان کرایەوە بەتایبەت لەبوارە سیاسی، ئابووری و کەلتورییەکان بەشێوەیەک کە هاوکاربێت لەبەرەوپێشچوونی هەرێمی کوردستان.

سەرۆک بافڵ جەلال تاڵەبانی پەرۆشیی یەکێتی بۆ پەرەپێدان و پتەوترکردنی پەیوەندی لەمێژینەی نێوان هەرێم، یەکێتی و پارتی کۆمۆنیستی چین دووپاتکردەوە و رایگەیاند: "بناغەی ئەم پەیوەندییە پتەوە لەسەر دەستی سەرۆک مام جەلال بونیادنراوە و ئێمەش دريژەپێدەر و هەماهەنگ دەبین"

لە بەرامبەردا وەفدی کۆماری چین جەختیان لە قووڵکردنەوەی پەیوەندییەکان و پشتیوانی زیاتر کردەوە لەپێناو گەشەپێدانی هەرێم و بەرەوپێشچوونی لەبوارە جیاوازەکاندا.
PUKMEDIA