سەرۆک بافڵ: هەوڵەکان بۆ دوورخستنەوەی مەترسییەکان بەردەوام بن

نوسینگەی رۆژنامەوانی سەرۆکی یەکێتی

سەرۆکی یەکێتی و سەرۆکی دەزگای ئاسایشی نیشتمانیی عیراق

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە حەمید شەتری، سەرۆکی دەزگای ئاسایشی نیشتمانیی عیراق.

لە دیدارێکدا کە شاڵاو کۆسرەت رەسوڵ و جەلال شێخ ناجی، سەرۆکی ئاژانسی پاراستن و زانیاری/زانیاری و ژمارەیەک لە لێپرسراوانی دەزگا ئەمنییەکان ئامادەیبوون، دۆخی ئەمنی و هەماهەنگییە سەربازی و هەواڵگرییەکانی نێوان دەزگا ئەمنییەکانی هەرێم و عیراق گفتوگۆیان لەبارەوەکرا.

لە دیدارەکەدا جەخت لە گەشەسەندن و پەرەپێدانی پەیوەندییە سەربازی، هەواڵگری و ئەمنییەکان کرایەوە وەک فاکتەرێکی سەرەکی پاراستنی سەقامگیری و دوورخستنەوەی هەر مەترسییەک کە ژیان و ئارامیی هاوڵاتیان بخاتە مەترسییەوە.

سەرۆک بافڵ جەلال تاڵەبانی بەگرنگییەوە ئاماژەی بە کردە سەربازی و هەواڵگرییە هاوبەشەکانی نێوان دەزگاکانی هەرێم و بەغدا کرد و وتی: "هەماهەنگی و هاریکارییەکان لەماوەی رابردوودا ئەنجامی ئەرێنی و دڵخۆشکەری هەبووە بۆیە دەبێت لە داهاتووشدا بەهەمان رۆحییەتەوە لە هەوڵەکانمان بۆ دوورخستنەوەی مەترسییەکان بەردەوامبین".
PUKMEDIA