قوباد تاڵه‌بانی: هه‌ماهه‌نگی نێوان راگه‌یاندن و ناوه‌نده‌كانی فێربوون زۆر به‌جێیه‌

PUKMEDIA

قوباد تاڵەبانی جێگری سەرۆکی ئەنجومەنی وەزیران

رێوڕه‌سمی ئیمزای یاداشتی لێكتێگه‌شتن له‌نێوان هه‌ردوو زانكۆی سلێمانی، زانكۆی پۆلیته‌كنیكی سلێمانی و ده‌زگای میدیایی وێستگه‌ نیوز به‌ڕێوه‌چوو.

ئه‌مڕۆ یه‌كشه‌ممه‌ 12-2-2023، با ئاماده‌بوونی قوباد تاڵه‌بانی، جێگری سه‌رۆكی ئه‌نجومه‌نی وه‌زیران و هه‌ڤاڵ ئه‌بوبه‌كر پارێزگاری سلێمانی و سه‌رۆكه‌كانی زانكۆی سلێمانی و زانكۆی پۆلیته‌كنیكی سلێمانی و سەرۆکی دامەزراوەی میدیایی وێستگەنیوز، رێوڕه‌سمی ئیمزای یاداشتی لێكتێگه‌شتن له‌نێوان هه‌ردوو زانكۆی سلێمانی، زانكۆی پۆلیته‌كنیكی سلێمانی و ده‌زگای میدیایی وێستگه‌ نیوز ئیمزا كرا.

قوباد تاڵه‌بانی جێگری سه‌رۆكی ئه‌نجومه‌نی وه‌زیران له‌ وتارێكدا كه‌ له‌ رێوڕه‌سمه‌كه‌دا پێشكه‌شی كرد رایگه‌یاند: "كه‌ ده‌بینم ناوه‌ندی ئه‌كادیمی و میدیا پێكه‌وه‌ كار ده‌كه‌ن جیگه‌ی دڵخۆشییه‌ بۆ من"، "میدیا شوێنێك نییه‌ ته‌نیا بۆ بڵاوكردنه‌وه‌ی هه‌واڵ، میدیا ده‌بێت خه‌ڵك هۆشیار و ئاگادار بكاته‌وه‌".

"زانكۆكانمان ته‌نها شوێنێك نین بۆ ده‌رچواندنی خوێندكار و دابه‌شكردنی بڕوانامە، ده‌بێت شوێنێك بن بۆ فێربوون و هۆشیاركردن"، قوباد تاڵه‌بانی وایوت.

وتیشی: "زانكۆكانمان به‌شێكن له‌ كۆمه‌ڵگه‌، ده‌بێت به‌شێك بن له‌ گه‌شه‌كردنی ئابوری ناوچه‌كه‌ و هۆشیاركردنه‌وه‌ی كۆمه‌ڵگه‌".

ئاماژه‌ی به‌وه‌شدا: "ئاگاداركردنه‌وه‌و هۆشیاركردنه‌وه‌ جه‌وهه‌ری ئیشی راگه‌یاندنه‌، هه‌ماهه‌نگی نێوان ده‌زگاكانی راگه‌یاندن و ناوه‌نداكانی فێربوون هه‌ماهه‌نگییه‌كی زۆر به‌جێیه‌ و ئه‌م پڕۆژه‌یه‌ جێگای ده‌ستخۆشییه‌".

ئه‌وه‌شی خسته‌ڕوو:" ماوه‌یه‌كی زۆره‌ میدیا به‌كارهێنراوه‌ بۆ شه‌ڕ، بۆ ئازاردانی یه‌كتر و بڵاوكردنه‌وه‌ی رق و كیه‌ن و بۆ ئاڵۆزكردنی دۆخێك كه‌ خۆی له‌خۆیدا ئاڵۆزه‌، كلتورێك دروستبووه‌ كه‌ هه‌موومان به‌شێك بووین له‌و كلتوره‌، چ هه‌واڵێك سه‌رنجڕاكێش بێت بینه‌ر و بیسه‌ر و خوێنه‌ری زیاتره‌، به‌ڵام له‌رێگه‌ی پرۆژه‌ی وێستگه‌ كڵاسه‌وه‌ ده‌توانین ئه‌و كلتور ناشرینه‌ بسڕینه‌وه‌و گه‌نجه‌كانمان هانی گه‌ڕان و فێركردن بكه‌ین".

"بە تامەزۆییەوە چاوەرێی کڵاسەکان دەکەم و دڵنیام شتێکیان لێ فێردەبم، هیوادارم کە وێستگەکڵاس  یارمەتیدەر بێت نەهێلێ ئەو کەسانەی نیەتیان خراپە و مەترسیدارن پێگەی خۆیان بەکاربێنن بۆ چەواشەکاری خەڵک"، جێگری سه‌رۆكی ئه‌نجومه‌نی وه‌زیران وایوت.
PUKMEDIA