نوێترین ئامارەكانی كەمپینی هاوخەمتانین لە سلێمانی

شەفافیەت

نوێترین ئامارەكانی كەمپینی هاوخەمتانین لە سلێمانی

بەپێی نوێترین ئامار، کە لەسایتی شەفافیەت بڵاوکراوەتەوە، ئەمڕۆ شەممە کە کۆتا رۆژی كەمپینی (هاوخەمتانین)ە لە سلێمانی، تا ئێستا 389 ملیۆن و 292 هەزار و 750 دیناری عیراقی و 132 هەزار و 840 دۆلاری ئەمریكی بۆ زیانلێكەوتووانی بومەلەرزەكەی باكور و رۆژئاوای كوردستان كۆكراونەتەوە.

بەپێی نوێترین ئامارەکان ژمارەی گیان لەدەستدان لە تورکیا گەیشتوەتە 21 هەزار و 848 کەس و برینداریش زیاترە لە 80 هەزار کەس، هاوکات نوێترین ئاماری زیانە گیانییەکان لە سوریا گەیشتوەتە 7 هەزار 396 بریندار و گیانلەدەستدانیش گەیشتوەتە 4 هەزار و 487 کەس.

بەرەبەیانی رۆژی دوو شەممە 6-2-2023، بومەلەرزەیەك بە گوڕی 7.4 پلە بە پێوەری رێختەر، باكوری كوردستان و توركیا و رۆژئاوای كوردستان و سوریای هەژاند و زنجیرەیەک بومەلەرزەی یەک لەدوای یەک رویداو بەهۆیەوە ژمارەیەکی زۆر باڵەخانەو خانوو خاپوور بوون.

PUKMEDIA