مەڵبەندی 17ی یەكێتی: كەركوك لەدیدی سەرۆك مام جەلال و یەكێتیدا گرنگ و ستراتیژییە

PUKMEDIA

موڕافەعە گەورەكەی سەرۆك مام جەلال

مەڵبەندی 17 ی رێكخستنی رۆژئاوای كەركوك لە یادی 19 ساڵەی موڕافەعە گەورەكەی سەرۆك مام جەلال لە ئەنجومەنی حوكم پەیامێك بڵاودەكاتەوە و رایدەگەیەنێت: "مورافەعەكەی سەرۆك مام جەلال فاكتەرێكی سەرەكی چەسپاندنی ماددەی 58 لە یاسای ئیدارەی كاتی دەوڵەت و دواتریش ماددەی 140 لە دەستووری ھەمیشەیی عیراق بوو".

دەقی پەیامەكە:

19 ساڵ لەمەوبەر سەرۆك مام جەلال یەكەمین بەردی بناغەی خەباتی یاسایی و دەستووریی و مێژوویی كوردستانیی بوونی كەركوك و ناوچە دابڕێندراوەكانی لە مێژووی عیراقی نوێی پڕ ململانێ و كێشمەكێشی سیاسی دانا و بە پشتبەستن بە بەڵگە و نەخشەی مێژوویی، كوردستانی بوونی كەركوكی سەلماندووە.

رەوانشاد سەرۆك مام جەلال ھیچ بوارێكی نەھێشتەوە بۆ نكوڵیكردن لەو حەقیقەتە ھەر ئەمەش بووە فاكتەرێكی سەرەكیی چەسپاندنی ماددەی 58 لە یاسای ئیدارەی كاتی دەوڵەت و دواتریش ماددەی 140 لە دەستووری ھەمیشەیی عیراق.

كەركوك لە دیدی سەرۆك مام جەلال و یەكێتیی نیشتمانیی كوردستاندا، مەسەلەیەكی گرنگی ستراتیژییە و سازشی لەسەر ناكرێت. ئێمەش ھەمان روئیامان ھەیە و دەبێت لەو چوارچێوەیە‌شدا بە پلانێكی نیشتمانییانەوە و دوور لە موزایەدە كار بۆ ئاساییكردنەوەی بارودۆخی ئاڵۆزی ئێستای كەركوك و ناوچە‌ جێناكۆكە‌كانی تر بكە‌ین. 

كەركوك بۆ یەكێتیی نیشتمانیی كوردستان بەشێكی دانەبڕاوە لە خاكی پیرۆزی كوردستان و خۆمان بەخاوەنی راستەقینەی كەركوك دەزانین، چۆن باوك و باپیرانمان جێیان نەھێشت و قوربانییان بۆ داوە، ئێمەش جێی ناھێڵین و پارێزگاری لە كوردبوونمان و پێكەوەژیانی ھەموو نەتەوە و پێكھاتە و ئاینزاكان دەكەین، ئاشتی كۆمەڵایەتی لەو شارە لەپێشینەی كارەكانمان دەبێت.

لەم ڕۆژە مێژووییەدا پەیمانی خۆمان دووپات دەكەینەوە كە هەمیشە هەڵگری پەیام و ڕێبازی سەرۆك مام جەلال بین و هەڵگری خەمی نەتەوە و زمان و بەرژەوەندی خەڵكی كوردستان بین و مێژووی درەوشاوە و پڕ لە سەروەری سەرۆك مام جەلالیش دەكەینە سەرمەشقی خۆمان و بە ئومێدەوە لە داهاتوو دەڕوانین.

لەم ڕۆژەدا سڵاوو وەفا دەنێرین بۆ گڵكۆی رابەر و سەركردە سەرۆك مام جەلال وبەڵێنیش دووپات دەكەینەوە هەمیشە پارێزەر و پێشمەرگەیەكی بە ئەمەك و سەر راستی رێبازە پیرۆزەكەی سەرۆك مام جەلال بین و تا دوا هەناسەمان بەرگری لە كوردستانیی بوونی كەركوك و ناوچە جێناكۆكەكان بكەین

مەڵبەندی 17 ی رێكخستنی رۆژئاوای كەركوك

PUKMEDIA