پارێزگاری سلێمانی: بەرپرسیارانە هاوكارییەكان دەگەیەنینە باكور و رۆژئاوای كوردستان

كوردسات نیوز

كۆنگرەی لیژنەی باڵای كەمپینی هاوخەمتانین

كەمپینی هاوكاریتان بۆ زیانلێكەوتووانی بومەلەرزەكەی باكور و رۆژئاوایی كوردستان لە سلێمانی بەردەوامە و 70 ملیۆن دینار كۆكراوەتەوە، پارێزگاری سلێمانیش رایدەگەیەنێت: "بەرپرسیارانە كۆمەك و هاوكارییەكانیان دەگەیەنینە قوربانیان و زیانلێكەوتووانی بومەلەرزەكە".

لیژنەی باڵای كەمپینی هاوخەمتانین كۆنگرەیەكی رۆژنامەوانیان سازكرد و د. هەڤاڵ ئەبوبەكر پارێزگاری سلێمانی رایگەیاند: "كۆمەكێكی زۆر كۆكراونەتەوە و تا ئێستاش 70 ملیۆن دینار لەلایەن هاووڵاتیانی سلێمانییەوە بۆ زیانلێكەوتووانی بومەلەرزەكەی باكور و رۆژئاوای كوردستان كۆكراونەتەوە".

راشیگەیاند: "هاووڵاتیان دڵنیا دەكەینەوە بەرپرسیارانە كۆمەك و هاوكارییەكانیان دەگەیەنینە باكور و رۆژئاوای كوردستان و لە گەیاندنی كۆمەكەكانیش ئەولەویەت بۆ قوربانیان و كەمئەندامانی بومەلەرزەكە دەبێت".
"بەدەمەوەهاتنی هاووڵاتیان بۆ كەمپینی هاوخەمیتان، بارگرانی لەسەر كەسوكاری قوربانیانی بومەلەرزەكەی كەمدەكاتەوە" د. هەڤاڵ ئەبوبەكر وادەڵێت.

وتیشی: "سوپاسی هاووڵاتیان دەكەین كە بەرپرسیارانە و بەپەرۆشییەوە بەدەم كەمپینەكەوە دێن و دڵنیابووین دەبێتە كەمپینێكی گشتی". 
جێی ئاماژەیە ئەمڕۆ یەكەم كاروانی هاوكارییەكان لە هەرێمی كوردستانەوە دەگاتە باكور و رۆژئاوای كوردستان.

كەمپینی هاوخەمیتان كە لەلایەن دەزگا میدیایی كوردسات و رێكخراوی منداڵپارێزی كوردستان و مۆزەخانەی نیشتمانی ئەمنەسورەكەوە لە سلێمانی راگەیەندراوە بۆ ماوەی 5 رۆژ بەردەوام دەبێت و هاووڵاتیان دەتوانن لەرێی ژمارە تەلەفۆنی 07501194074 هاوكارییەكانیان بە FastPay، بگەیەننە كەمپینەكە.

بەرەبەیانی رۆژی دوو شەممە 6-2-2023، بومەلەرزەیەك بە گوڕی 7.4 پلە بە پێوەری رێختەر، باكوری كوردستان و توركیا و رۆژئاوای كوردستان و سوریای هەژاند، بەپێی دواین ئاماریش جگە لە زیانێكی ماددی زۆر كە بەر ئەو ناوچانە كەوتوون، 16 هەزار و 400 كەس گیانیان لەدەستداوە و 63 هەزار كەسیش بریندارن.

PUKMEDIA