سەرۆك بافڵ: بەڕێزەوە یادی شەهیدان شەوكەتی حاجی موشیر و حیكمەت حاجی عوسمان و سەردار غەفور دەكەینەوە

PUKMEDIA

شەهیدان شەوكەتی حاجی موشیر و حیكمەت حاجی عوسمان و سەردار غەفور

لەیادی 20 ساڵەی شەهیدبوونی سەركردەی تێكۆشەر شەوكەتی حاجی موشیر و هەردوو فەرماندە (حیكمەت حاجی عوسمان و سەردار غەفوور سلێمان)دا، بافڵ جەلال تاڵەبانی سەرۆكی یەكێتیی نیشتمانیی كوردستان پەیامێكی بڵاوكردەوە و رایگەیاند: "لەم رۆژەدا بەڵێن بۆ رۆحی شەهیدان دووپاتدەكەینەوە كە هەمیشە پارێزەری ئارامی و ئاسایشی خاكە خۆشەویستەكەمان دەبین".

دەقی پەیامەكە:

لە بیستەمین ساڵیادی شەهیدبوونی سەركردەی تێكۆشەر كاك شەوكەتی حاجی موشیر و هەردوو فەرماندە (حیكمەت حاجی عوسمان و سەردار غەفوور سلێمان)دا، بەڕێزەوە یادی جوامێری و قارەمانێتی ئەو رۆڵە بەئەمەكانەی نیشتمان دەكەینەوە.

كاك شەوكەت نموونەی شۆڕشگێڕی دڵسۆز و وەفاداری كوردستان و یەكێتیی نیشتمانیی كوردستان بوو بەو ئازایەتی و نەبەردییەی لە بەرەی پێشەوەی شەڕەكاندا تۆماریكردبوو، ببووە جێگەی متمانەی سەرۆك مام جەلال. ئەو فەرماندەیەك بوو كە هەرگیز لە بەرپرسیارێتی راینەدەكرد و بە ئەوپەڕی ورەوە رووبەڕووی مەترسییەكان دەبووەوە و دواجار هەر لەوپێناوەشدا گیانی پیرۆزی بە كوردستان و خەڵكەكەی بەخشی.

ئەمڕۆ لەم یادە شكۆدارەدا بەڵێن بۆ رۆحی شەهیدان و خەڵكە خۆشەویستەكەمان دووپاتدەكەینەوە كە بۆ هەمیشە پارێزەری ئارامی و ئاسایشی خاكە خۆشەویستەكەمان دەبین و رێگە بەهیچ كەسێكیش نادەین ژیان و سەقامگیریی خەڵكەكەمان تێكبدات.

دروود بۆ رۆحی شەهیدان و سەربەرزی بۆ خانەوادە خۆڕاگرەكانیان

بافڵ جەلال تاڵەبانی
سەرۆكی یەكێتیی نیشتمانیی كوردستان

PUKMEDIA