لە سلێمانییەوە کەمپینی هاوخەمتانین بۆ باکور و رۆژئاوای کوردستان رادەگەیەنرێت

کوردسات

کەمپینی هاوکاری بۆ بوومەلەرزەکەی باکور و رۆژئاوای کوردستان رادەگەیەنرێت

کەمپینی کۆکردنەوەی شتومەک و پێداویستی لەسلێمانییەوە بۆ کوردانی باکور و رۆژئاوا دەستیپێکرد.

سەبارەت بە کەمپینەکە د. هەڤاڵ ئەبوبەکر پارێزگاری سلێمانی سوپاسی هەموو لایەنە بەشداربووەکانی کەمپینەکەی کردو راشیگەیاند: "پارێزگای سلێمانی سەرپەرشتی راستەوخۆی کەمپینەکە دەکات بۆ کۆکردنەوەی کۆمەک بۆ زیانلێکەوتوانی باکور و خۆرئاوای کوردستان و هەردوو دەوڵەتی تورکیا و سوریا".

"بۆئەوەی بتوانین بەشداربوونێکی کارا و خێرامان هەبێت لە بەدەمەوەچوونی هاونیشتیمانی و کەسوکارەکانی خۆمان تا بتوانین بە ئەرکێکی مرۆڤانە لە خەمیاندا بین و بتوانین بە زوترین کات ئەوەی پێویستیانە پێیان بگەیەنین"، پارێزگاری سلێمانی وایوت.

لەوبارەیەشەوە ئاوات محەمەد قائیمقامی سلێمانی لە کۆنگرەیەکی رۆژنامەوانیدا رایگەیاند:" هەموو کات خەڵکی شارە حەیاتەکە هەرچییان پێکرابێت بۆ کوردانی پارچەکانی دیکەی کوردستان درێخییان نەکردووە وهەڵوێستییان هەبووە".

وتیشی:"ئەمڕۆش لە پارێزگای سلێمانییەوە کەمپینی بەهاناوەچوونی کوردانی باکور و رۆژئاوای کوردستان، بە کۆکردنەوەی پێداویستی و شتومەک راگەیەنراوەو ئێمەش وەکو قائیمقامییەتی سلێمانی پشتگیری کەمپینەکە دەکەین".

کەمپینەکە لەلایەن دەزگای میدیایی کوردسات بەهەماهەنگی لەگەڵ مۆزەخانەی نیشتمانی ئەمنەسوورەکە و منداڵپارێزی کوردستان و رێکخراوی هۆڕایزن بەڕێوەدەچێت.

هاوکات لە کەمپینەکەدا داوا لە خێرخوازان دەکریت کە زۆرترین پێداویستی وەک ( پارە-بەتانی-خێمە-راخەر-کورسی خاوەن پێداویستی تایبەت-دارشەق-جلوبەرگ-پێداویستی پزیشکە سەرەتایی) پێشکەشی کەمپینەکە بکەن.

لە هەمان کاتدا هۆزان عەفرینی سەرۆکی ئەنجومەنی پەنابەرانی کوردانی رۆژئاوا بە PUKMEDIA ی راگەیاند: "دەستخۆشی لە شاری سلێمانی و کەناڵی کوردسات دەکەین بۆ ئەم هەڵمەتەی لەپێناو خزمەتی کوردانی باکور و رۆژئاوا دەستیان پێکردووە".

وتیشی: "کوردانی رۆژئاوا بەتایبەت ئەو ناوچانەی کە بومەلەرزەکە زیانی پێگەیاندوون لە بارودۆخێکی زۆر خراپدان و چەندین کەس تا ئێستا لەژێر دار و بەردوی باڵەخانە روخاوەکاندا ماونەتەوە و هیچ وڵات و لایەنێک ئاوڕی لێنەداونەوەتەوە، لێرەوە داوا لە خەڵکی هەرێمی کوردستان و ئامادەکارانی ئەم کەمپینە دەکەم کە هاوکارییەکانیان بگەیەننە کوردانی رۆژئاوا تا بتوانین پێکەوە هاوکاریان بین و بەهانایانەوە بچین".

هەروەها زانکۆی راپەڕین بە هاوبەشی دامەزراوەی میدیایی کوردسات ئەمڕۆ سێ شەممە 7-2-2023، کەمپینی هاوکاری بۆ زیانلێکەوتووانی بومەلەرزەکەی باکوور و رۆژئاوای کوردستانی راگەیاند.

لەوبارەوە د. پێشەوا حەمید عەبدوڵڵا یاریدەدەری سەرۆکی زانکۆی راپەڕین بۆ کاروباری خوێندکاران رایگەیاند: "زانکۆی راپەڕین بە ئەرکی سەرشانی خۆی دەزانێت وەک ئەرکێکی نیشتمانی و ئەخلاقی و مرۆڤایەتی، کەمپینێک رابگەیەنێت تا بتوانین هاوکاری خۆمان بگەیەنینە خوشک و براکانمان لە باکور و رۆژئاوای کوردستان لەو کارەساتەی بەسەریاندا هاتووە".

کەمپینەکە لە سەرۆکایەتی زانکۆی راپەرین لەمڕۆوە 7-2-2023 و رۆژانی دواتر بەردەوام دەبێت لە سەعات 10ـی بەیانی تا 4ـی ئێوارە.

ئەمەش لە کاتێکدایە سەرلەبەیانی دوێنێ بوومەلەرزەیەک بە گوڕی  7.4پلەی رێختەر، چەند شارێکی تورکیا و سوریای هەژاند و بەوهۆیەشەوە ژمارەیەکی زۆر گیانلەدەستدان و برینداری لێکەوتەوە.
بەپێی تازەترین ئامار ژمارەی قوربانییەکان لە باکووری کوردستان و تورکیا گەیشتووەتە3381 کەس و 20 ھەزار و 426 کەسیش برینداربوون ، هاوکات بەهۆی بوومەلەرزەکەشەوە 5 هەزار و 775  باڵەخانە رووخاون.

هەروەها لە رۆژئاوای کوردستان و سوریا، تا ئێستا 1500 کەس گیانیان لەدەستداوە و 3 ھەزار و 600 کەسیش برینداربوون .