سەرۆك بافڵ بۆ باڵیۆزی ئەمریكا: لەگەڵ دواخستنی هەڵبژاردندا نین

نووسینگەی سەرۆكی یەكێتی

كۆبوونەوەی سەرۆكی یەكێتی و باڵیۆزی ئەمریكا لە عیراق

بافڵ جەلال تاڵەبانی، سەرۆكی یەكێتیی نیشتمانیی كوردستان لە بەغدا پێشوازی لە ئەلینا رۆمانۆسكی، باڵیۆزی ئەمریكا لە عیراق كرد و رایگەیاند: "ئامانجمان دەستەبەركردنی ژیانێكی ئارام و سەقامگیرە بۆ خەڵكەكەمان، پێویستیشە بەزووترین كات كۆتایی بە ناكۆكییەكان بهێنرێت" لەبارەی هەڵبژاردنیشەوە رایگەیاند: "لەگەڵ دواخستنیدا نین".

لە دیدارێكدا دۆخی سیاسی و ئابووری عیراق گفتوگۆی لەبارەوەكرا و جەخت لە چارەسەركردنی كێشەكانی نێوان هەولێر و بەغدا كرایەوە، سەرۆك بافڵ ئاماژەی بە هەنگاوەكانی یەكێتیی نیشتمانیی كوردستان كرد بۆ كۆتاییهێنان بە ناكۆكییەكانی نێوان هەولێر و بەغدا دەستپێكی قۆناغێكی نوێی سیاسی كرد و رایگەیاند: "خەڵكەكەمان قوربانی سەرەكی ناكۆكییەكانن و پێویستە بەزووترین كات كۆتایی بەو دۆخە نەخوازراوە بهێنرێت. دەبێت رێككەوتنێكی یەكجارەكی بكرێت و چارەسەرێكی بنچینەیی بۆ كێشەكان بكرێت، بۆ ئەمەش دەبێت دەستوور خاڵی یەكلاكەرەوە بێت".

لەبارەی دۆخی هەرێم و ژیانی هاووڵاتییانەوە سەرۆك بافڵ بەرچاوڕوونیدایە باڵیۆزی ئەمریكا و وتی: "ئامانجی ئێمە دەستەبەركردنی ژیانێكی ئارام و سەقامگیرە بۆ خەڵكەكەمان، هەموو هەوڵێكیش لەو پێناوەدا دەدەین و ژیانی خەڵك لەسەروو هەمووشتێكەوەیە".

سەبارەت بە ئەنجامدانی هەڵبژاردنیش لەوادەی خۆیدا سەرۆك بافڵ رایگەیاند: "ئێمە لەگەڵ دواخستنی هەڵبژاردندا نین، بەڵام پێویستە یاسای هەڵبژاردن هەموار بكرێتەوە و تۆماری دەنگدەران پاكبكرێتەوە".

PUKMEDIA