د. ڕێواز فایەق: هەموو داهاتی نەوتی هەرێم بۆ وەزارەتی دارایی ناگەڕێتەوە

سەرۆكی پەرلەمانی كوردستان داوا لە لایەنە سیاسییەكانی كوردستان دەكات یارمەتی سەرۆكایەتی پەرلەمان بدەن بۆ ئەوەی هەڵبژاردنی پەرلەمانی كوردستان لەكاتی خۆیدا ئەنجامبدرێت.

د.ڕێواز فایەق سەرۆكی پەرلەمانی كوردستان لەدیدارێكدا لەگەڵ كەناڵەكانی ڕاگەیاندن ڕایگەیاند: یەكێتیی نیشتمانیی كوردستان لەگەڵ ئەنجامدانی هەڵبژاردنە لەكاتی خۆی و داوای لە لایەنە سیاسییەكانی كوردستان كرد كە یارمەتی سەرۆكایەتی پەرلەمان بدەن بۆ ئەوەی هەڵبژاردن لەكاتی خۆیدا بكرێت.

وتیشی: بەهۆی ناكۆكییە سیاسییەكان نەبووین بە خاوەنی دەستووری خۆمان و هەندێك لایەن دەستووریان پێگرنگ نییە و بە سازان دەتوانین یاسای هەڵبژاردن هەموار بكەینەوە و ئەو یاسا و بابەتانەی كە ڕەهەندی نیشتمانییان هەیە پێویستی بە سازان هەیە. 

سەبارە بە نەوت و داهاتەكانی وتیشی: نابێت پشت تەنها بە داهاتی نەوت ببەستین و هەموو داهاتی نەوتی هەرێم ناگەڕێتەوە بۆ وەزارەتی دارایی.

لەبارەی پڕۆژە یاسای بودجەی هەرێم وتیشی: نەهاتنی پڕۆژە یاسای بودجەی هەرێم بۆ پەرلەمان پێشێلكاری یاساییە. 

 سەرۆكی پەرلەمان ئاماژەی بەوەشكرد كە زۆرترین دەرفەتی قسەكردن دەدەم بە لایەنە ئۆپۆزسیۆنەكان و لە 2 ساڵی ڕابردوودا بەشێوەی جیاواز كارمان كردووە و بە هەرەمەكی یاسامان دەرنەكردووە و 30 یاسا و بڕیارمان لەم خولەدا دەركردووە . 
PUKmedia تایبەت