وەزیری دادی عیراق سەروەت و سامانی خۆی ئاشکرا دەکات

راگەیاندنی وەزارەت

د. خالید شوانی وەزیری دادی عیراق

د. خالید شوانی وەزیری دادی عیراق، وەک یەکەم وەزیر سەروەت و سامانی خۆی ئاشکرا کرد و تەواوی دۆسیەی خۆی رەوانەی دەستەی دەستپاکی کرد.

 بەپێی راگەیەندراوێکی نوسینگەی راگەیاندنی وەزیری داد، ئەمڕۆ 17ی5ی2026، خالید شوانی وەزیری داد، تەواوی سامانی خۆی ئاشکرا کردووە و پێشکەشی فەرمانگەی پاراستنی لە دەستەی دەستپاکی فیدڕاڵی کردووە.

 ئاماژەی بەوەشکردووە: وەزیری داد، وەک پابەند بوونی بە یاسا کارپێکراوەکان و لە پێناو شەفافیەت، سامانی خۆی ئاشکرا کردووە.

هەر بەپێی راگەیەندراوەکە، خالید شوانی وەزیری داد، دووپاتی کردووتەوە، ئەم هەنگاوەی وەک پێویستیەکی کاری حکومی و پێودەنگەکانی شەفافی جێبەجێ کردووە.

 ئەمەش لەکاتێکدایە، لە کۆبوونەوەی دوێنێی ئەنجومەنی وەزیرانی عیراق، بڕیادرا، کە تەواوی وەزیرەکان سەروەت و سامانی خۆیان ئاشکرا بکەن، بەمەش د. خالید شوانی وەزیری داد، دەبێتە یەکەم وەزیری کە سامانی خۆی ئاشکرا بکات.

PUKMEDIA