پزیشکێکی جوانکاری بە ڕۆنی قرچاو ڕووخساری هاوسەری پێشووی شێواند

میدیاکان

فەیروزە پزیشکی بێهۆشکاری

لە ڕووداوێکی توندوتیژیدا لە بەغداد، پزیشکێکی جوانکاری بە ڕۆنی قرچاو هێرشی کردە سەر هاوسەری پێشووی و بەهۆیەوە روخساری  بەتەواوی شێواوە ، تۆمەتبارەکەش لە کاتی هەڵاتنیدا لە فڕۆکەخانەی بەغداد دەستگیرکرا.

میدیا عیراقییەکان بڵاویان کردەوە، قوربانییەکە ناوی فەیروزەیە و پزیشکی بێهۆشکارییە، رۆژی 5ی7ی2026 لە شوقەکەی خۆی لە کۆمەڵگەی نەخیلی نیشتەجێ بوون لە بەغداد، هاوسەری پێشووی  کە پزیشکێکی جوانکارییە بەناوی "محەممەد عەقیدی" هێرشی کردووەتە سەر و بە رۆنی قرچاو روخساری سوتاندووە، کە بووەتە هۆی دەرھێنان و لەدەستدانی یەکێک لە چاوەکانی.

دوای هێرشەکە،تۆمەتبارەکە ڕاستەوخۆ لەگەڵ کوڕەکەیدا بەرەو فڕۆکەخانەی نێودەوڵەتیی بەغداد هەڵاتووە بە مەبەستی ڕاکردن بۆ دەرەوەی وڵات، بەڵام پێش گەشتکردنی لەلایەن هێزە ئەمنییەکانەوە بە مادەی 412 لە یاسای سزادانی عیراقی دەستگیر کراوە.

 بەپێی میدیا عیراقییەکان، ئەم دوو هاوسەرە پێشتر بەهۆی کێشەیەکەوە جیابوونەتەوە، هەر ئەم کێشەیەش هۆکاری هێرشی تۆمەتبارەکە بووە، رووداوەکەش لەسەر ئاستی عیراق توڕەیی لێکەوتەوە، کە لە تۆڕە کۆمەڵایەتییەکانەوە، هاووڵاتیان داوا دەکەن توندترین سزا بدرێن.

PUKMEDIA