دەزگای ئاسایش هەرێم، دەستگیرکردنی سێ تیرۆریستی داعش ڕادەگەیەنێت

تایبەت

تیرۆرستە دەستگیر کراوەکان

بەڕێوەبەرایەتی گشتی ئۆپراسیۆنەکانی ئاسایش دوای بەدواداچوون و لەسەر بنەمای ئاڵوگۆڕی زانیاری و هەواڵگری، لەمانگەکانی 4 و 6ی 2026دا  لەسنووری پارێزگاکانی سلێمانی و کەرکوک سێ تیرۆریستی داعشیان دەستگیرکرد.

بەپێی راگەیەندراوێکی دەزگای ئاسایشی هەرێم، کە کۆپییەکی بۆ PUKMEDIA نێردراوە، تیرۆریستان بەناوەکانی ( چ.ئـ ، ت.ب.ر ، پ.ف.س )دوای ئەوەی هەوڵی هیجرەتیان داوە، بەڵام لەبەر باری ئەمنی و داخستی هەموو ڕێگاکان لەلایەن هێزەئەمنیەکانەوە بۆیان نەکراوە و لەپێشووتردا بڕیاری ئەوەیان داوە دەعوە بکەن و کاریان بڵاوکردنەوەی ڤیدیۆ و نووسین و وێنەکانی داعش و فکرەی توندڕەوی بووە لە 10 پەیج و ئەکاونتی تۆڕەکۆمەڵایەتییەکانی (فەیسبووک، تیکتۆک، ئینستاگرام، تەلەگرام، یوتوب)کردووە، لەدوای وەرگرتنی بڕیاری دادوەر داواکراوان دەستگیرکران.

دەزگای ئاسایشی هەرێم، ئاماژە بەوەشدەکات: لە درێژەی لێکۆڵینەوەکاندا، تیرۆریستان دانیان بەوەداناوە لەتۆڕەکۆمەڵایەتیەکانەوە دەعوەیان کردووە و هانی گەنجان و هەرزەکارانیان داوە بۆ وەرگرتنی فکرەی توندڕەوی و چوونە ناو رێکخستنەکانی داعش و هیجرەتکردن بۆ ناو ڕیزەکانی داعش.

لە کۆتایشدا، رایگەیاندووە: لەئێستادا تۆمەتباران بەماددەی(2) لەیاسای تیرۆر ڕاگیراون و لێکۆڵینەوە لەدۆسییەکانیان بەردەوامە.

PUKMEDIA