شا چارڵز بۆ نزار ئامێدی: بایەخێکی زۆر بە پەیوەندییەکانمان لەگەڵ عیراق دەدەین

نوسینگەى راگەیاندنى سەرۆک کۆمار

وێنەى نزار ئامێدی سەرۆک کۆمارى عیراق و شا چارڵزی سێیەم پاشای شانشینی یەکگرتووی بەریتانیای مەزن و ئێرلەندای باکوور

نزار ئامێدی سەرۆک کۆمارى عیراق، نامەیەکی پیرۆزبایی لەلایەن خاوەن شکۆ شا چارڵزی سێیەم، پاشای شانشینی یەکگرتووی بەریتانیای مەزن و ئێرلەندای باکوورەوە پێگەیشت، بەبۆنەی دەستبەکاربوونی لە ئەرکەکانیدا.

لەو نامەیەدا، خاوەن شکۆ پاشا جەختی کردەوە کە شانشینی یەکگرتوو بایەخێکی زۆر بە پەیوەندییەکانی لەگەڵ عیراق دەدات، ئاماژەی بە پەرۆشی خۆشی کرد بۆ بەردەوامبوون لە بەهێزکردنی کۆڵەکەکانی دۆستایەتی نێوان هەردوو وڵات و هەردوو گەل.

شا چارڵز خۆشحاڵی خۆی نیشان دا بەرامبەر ئەو گەشەسەندنە ئەرێنییانەی کە عیراق لە ساڵانی دواییدا بەدەستی هێناوە، بەتایبەتی لە بواری بەهێزکردنی ئاسایشدا.

هەروەها هیوای خواست پێکەوە کاربکەن بۆ پاراستنی ئەو دەستکەوتانەی کە دوای قوربانیدانێکی زۆر لە عیراقدا بەدی هاتوون، و کاربکەن بۆ چەسپاندنی سەقامگیری بۆ عیراقییەکان و تەواوی ناوچەکە.

هەر لە نامەکەدا، جەنابی پاشا پێشوازی لە ئاستی هاوکارییە نزیکەکانی نێوان هەردوو وڵات کرد لە رووبەڕووبوونەوەی کاریگەرییەکانی گۆڕانی کەشوهەوا و ئاسایشی ئاو، و کارکردنی هاوبەش لە پێناو بونیادنانی داهاتوویەکی ئارامتر و گەشاوەتر بۆ هەردوو وڵات.


PUKMEDIA