ئەمڕۆ پەرلەمان بۆ دەنگدان لەسەر کابینەکەی عەلی زەیدی کۆدەبێتەوە

راگەیاندنى ئەنجومەنى نوێنەرانى عیراق

دانیشتنی ئەنجومەنی نوێنەران

بڕیارە ئەمڕۆ ئەنجومەنى نوێنەرانى عیراق بۆ دەنگدان لەسەر بەرنامەی وزاریی و حكومەتی سەرۆكوەزیرانی راسپێردراو عەلی فالح زەیدی دانیشتن ئەنجامبدات.

بڕیارە ئەمڕۆ پێنج شەممە 14ى5ى2026 دانیشتنى ژمارە 24ى ئەنجومەنى نوێنەرانى عیراق سەعات چوارى پاش نیوەڕۆ بەڕێوەبچێت.

هەر بەپێى کارنامەى بڵاوکراوەى پەرلەمان، دانیشتنەکە بۆ دەنگدان لەسەر بەرنامەی وزاریی و حكومەتی سەرۆكوەزیرانی راسپێردراو عەلی فالح زەیدییە.

ئەمەش لەکاتێکدایە، رۆژی دووشەممە 27ی نیسانی 2026 لە مەراسیمێکی رەسمیدا کە لە کۆشکی بەغداد بەڕێوەچوو، نزار ئامێدی سەرۆک کۆماری عیراق، عەلی زەیدی بۆ پێکهێنانی حکومەتی نوێی عیراق راسپارد.

بڕیاربوو 12ی5ی2026، ئەنجومەنی نوێنەرانی عیراق، بۆ دەنگدان بە کابینەی نوێی حکومەتی عیراق کۆببیتەوە و دەنگی پێبدات، بەڵام کۆبوونەوەکە دواخرا و دوێنێ چوارشەممە 13ی5ی2026 ئەنجومەنی نوێنەرانی عیراق کاتی بەڕێوەچوونی دانیشتنی ئەنجومەنەکەی، بۆ دەنگدان لەسەر حکومەتی نوێی عیراق بە سەرۆکایەتی عەلی زەیدی راگەیاند کە ئەمڕۆیە.

ئەمەش لە کاتێکدایە پێنج شەممەى رابردوو 7ى5ى2026 هەیبەت حەلبوسی سەرۆکی ئەنجومەنی نوێنەران، پێشوازی کرد لە عەلی فالح زەیدی سەرۆک وەزیرانی راسپێردرا و لەکۆبوونەوەکەدا، سەرۆکی ئەنجومەنی نوێنەران کارنامەی وزاریی لە سەرۆک وەزیرانی راسپێردراو وەرگرت و فەرمانی دا بەسەر ئەندامانی ئەنجومەنی نوێنەراندا دابەش بکرێت بە مەبەستی خوێندنەوە و ئاگاداربوون لە وردەکارییەکانی، هاوکات سەرۆکی ئەنجومەنی نوێنەران جەختی کردەوە لەسەر ئامادەیی ئەنجومەنی نوێنەران بۆ دیاریکردنی وادەی دانیشتنی چاوەڕوانکراو بە مەبەستی دەنگدان لەسەر کارنامەی وزاری و پێکهاتەی حکومەت، هەر کاتێک ناوی کاندیدەکان لەلایەن سەرۆک وەزیرانی راسپێردراوەوە رەوانە بکرێت.

PUKMEDIA