سه‌رۆككۆمارو سه‌رۆكوه‌زیران پرسی پێكهێنانی حكومه‌ت و دۆخی وڵات تاوتوێ ده‌كه‌ن

راگەیاندنی نزار ئامێدی، سەرۆك كۆماری عیراق

كۆبوونەوەی سەرۆك كۆمار و سەرۆك وەزیرانی عیراق

نزار ئامێدی، سەرۆك كۆماری عیراق، ئەمڕۆ یەكشەممە 10ی ئایاری 2026، لەبەغداد چاوی بە محەمەد شیاع سودانی سەرۆك وەزیرانی عیراق كەوت و گفتوگۆی كۆی بارودۆخی گشتی وڵات و تاوتوێكردنی دوایین پێشهاتە هەرێمی و نێودەوڵەتییەكان كرا.

هاوكات لەكۆبوونەوەكەدا جەخت لەسەر گرنگی بەهێزكردنی لێكتێگەیشتنەكانی نێوان هێزە نیشتمانییەكان كرایەوە بەپێی بنەمای هاوبەشی، بە مەبەستی رێككەوتن لەسەر پێكهێنانی حكومەتی نوێ و پێدانی متمانە پێی بۆ دەستكردن بە جێبەجێكردنی كارنامەكەی، هەروەها بەردەوامیدان بە پڕۆژەكانی چاكسازی و گەشەپێدان و هەستانەوەی ئابوری، بەو شێوەیەی كە خواست و چاوەڕوانییەكانی هاووڵاتییان لەسەرانسەری ناوچەكانی وڵاتدا بەدی بهێنێت.

هەروەها هەردوولا جەختیان كردەوە لەسەر پێویستیی هاوكاری و هەماهەنگی هاوبەش لەنێوان سەرجەم هێزو لایەنە سیاسییەكان بۆ روبەڕوبوونەوەی ئاڵنگارییەكانی ئێستاو كاركردن بەڕۆحێكی نیشتمانیی بەرپرسانە بۆ چەسپاندنی سەقامگیری و بەدیهێنانی بەرژەوەندییە باڵاكانی نیشتمان.

PUKMEDIA