لیژنەیەکی هاوبەش بۆ چارەسەرکردنی گرفتی خانەنشینی هێزەکانی ئاسایشی ناوخۆ پێکهێنرا

فەرمانگەی راگەیاندنی ئەنجومەنی نوێنەران

کۆبوونەوەی لیژنەی ئاسایش و بەرگری لەگەڵ لێپرسراوانی وەزارەتی ناوخۆ و دەستەی خانەنشینی

ئەمڕۆ 10ی5ی2026، لیژنەی ئاسایش و بەرگری لە ئەنجومەنی نوێنەرانی عیراق، لەگەڵ لێپرسراوانی وەزارەتی ناوخۆ و دەستەی خانەنشینی گشتی کۆبوونەوە و تیایدا گفتوگۆ لەسەر هەمواری یاسای خانەنشینی هێزەکانی ئاسایشی ناوخۆ کرا و لیژنەیەکی هاوبەشیش پێکهێنرا.

لەو کۆبوونەوەیەدا، گفتوگۆ لەسەر پێشنیاری هەمواری یاسای خزمەت و خانەنشینی هێزەکانی ئاسایشی ناوخۆ ژمارە (18)ی ساڵی 2011 کرا، هەروەها تیشک خرایە سەر دیارترین ئەو گرفت و لەمپەرانەی ڕووبەڕووی کارمەندانی وەزارەتی ناوخۆ دەبنەوە، بەتایبەت ئەوەی پەیوەستە بە خانەنشینی و مافەکانیان، ئەمە جگە لەوەی باس لە دۆسیەی برینداران و ئاسانکاری ڕێکارەکانی پێدانی مۆڵەتی نەخۆشی کرا.

لە تەوەرێکی دیکەی کۆبوونەوەکەدا،گفتوگۆ لەبارەی پرسی هەموارکردنەوەی مووچەی برینداران، شەهیدان و خانەنشینان کرا، لەگەڵ چۆنیەتی ئەژمارکردنی مووچەی خانەنشینی بەپێی یاسا، بە شێوەیەک کە دادپەروەری بۆ ئەو توێژە تێدابێت و  لیژنەکە جەختی لە گرنگی هەموارە یاساییەکان کردەوە بۆ چارەسەری کێشەکان و پاراستنی مافی خانەنشینی.

لە کۆتاییشدا، بڕیار لەسەر پێکهێنانی لیژنەیەکی هاوبەش لەنێوان (لیژنەی ئاسایش و بەرگری ئەنجومەنی نوێنەران، وەزارەتی ناوخۆ، وەزارەتی دارایی/فەرمانگەی خانەنشینی گشتی) درا، بۆ ئەوەی لێکۆڵینەوە لە بڕگەکانی هەموارکردنەوەکە بکرێت و بەشێوەیەک چارەسەری گونجاو بۆ گرفتەکان بدۆزرێتەوە کە لەگەڵ پێداویستییە کارگێڕی و یاساییەکانی ئێستا بگونجێت.

PUKMEDIA