کەسوکاری شەهیدان، ئامادەی دادگایکردنی جەلادەکەی نوگرەسەلمان دەبن

PUKMEDIA

تاوانبار، عەجاج ئەحمەد حەردان تکریتی

بڕیار وایە ئەمڕۆ پێنجشەممە 7-5-2026 یەکەمین دانیشتنی دادگاییکردنی یەکێک لە تاوانبارە دیارەکانی تاوانەکانی ئەنفال لە سەردەمی رژێمی بەعسی لەناوچوو، بەناوی (عەجاج ئەحمەد حەردان تکریتی) ناسراو بە "حەجاجی نوگرەسەلمان" بەڕێوەبچێت.

ناوبراو قێزەونترین تاوانی دژ بە دەستگیرکراوان لە زیندانی نوگرەسەلمان لە بیابانی سەماوە لە باشووری عیراق ئەنجامداوە، کاتێک سەرپەرشتیاری ئەو زیندانە بووە کە دەستگیرکراوانی پڕۆسەکانی ئەنفالی بۆ گواستراوەتەوە.

دادگای باڵای تاوانەکانی عیراق لە یەکەمین دانیشتنی خۆیدا سەیری کەیسی تاوانبار عەجاج دەکات، دوای ئەوەی زیاتر لە 300 سکاڵا لەلایەن قوربانیانی پڕۆسەکانی ئەنفالەوە لە دژی تۆمارکراوە.

بەپێی ئەو زانیارییانەی دەست PUKMEDIA کەوتوون، دانیشتنی ئەمڕۆی دادگا شاهیدی ئامادەبوونی زیاتر لە 200 کەس لە کەسوکاری شەهیدان و قوربانیانی دەستی ئەم تاوانبارە دەبێت کە لە زیندانی نوگرەسەلمان دەستبەسەر بوون؛ ئەوان سکاڵاکانیان دژی ئەم تاوانبارە پێشکەش دەکەن کە تاوانی گەورەی ئەنجامداوە و زیندانیانی بە هەموو جۆرە ئەشکەنجەدان و کوشتنێک چەوساندووەتەوە.

ئەم ژمارەیەکی زۆر لە ئەنفالکراوانی ناو زیندانەکانی ئەشکەنجە داوە و کوشتوویەتی، بەتایبەتی ژنان و منداڵان،لە کاتی لێکۆڵینەوەکاندا بە خێرایی دانی بەو تۆمەتانەدا ناوە کە ئاڕاستەی کراون، بەتایبەت ئەو تاوانانەی دەرهەق بە کورد ئەنجامی داون.

PUKMEDIA