وەزارەتی پلاندانان ژیریی دەستكرد دەكاتە بنەمای داڕشتنی پلانە نیشتمانییەكان

ميدياكان

تەکنەلۆژیای AI بۆ بەهێزکردنی توانای کارمەندان

وەزارەتی پلاندانانی عیراق دەستپێكردنی بەرنامەی راهێنانی بۆ فەرمانبەرانی وەزارەتەكەی راگەیاند، بۆئەوەی بتوانن تەكنەلۆژیای ژیریی دەستكرد AI بەكاربهێنن، ئاماژە بەوەشدەكات: ئەم هەنگاوە نەخشەڕێگایەكی نوێیە بۆ گۆڕانكاری و بەرەوپێشەوەبردنی كارەكانیان.

عەبدولزەهرا ئەلهنداوی، وتەبێژی وەزارەتی پلاندانانی عیراق، ئەمڕۆ دووشەممە 4ی 5ی 2026 بە ئاژانسی هەواڵی عیراقی راگەیاند: وەزارەتەكەیان كاردەكات بۆ گۆڕینی ژیریی دەستكرد لە ئامڕازێكی تەكنەلۆژییەوە بۆ پایەیەكی بنەڕەتی كاری پلاندانان، بە ئامانجی دڵنیابوون لەبڕیارو پلانی وردتر.

ئاماژەی بەوەشكرد: وەزارەتی پلاندانان كۆمەڵێك رێكارو سیاسەتی گرتووەتەبەر لەوانەش، ئەنجامدانی كۆبوونەوەی تەكنیكی لەگەڵ نوێنەری كۆمپانیا تایبەتمەندەكان بۆ ئامادەكردن و دەستپێكردنی بەرنامەی راهێنانی تایبەتمەند بۆ ئەوەی فەرمانبەران بتوانن تەكنەلۆژیای AI لە كارەكانی حكومەتدا بە گشتی بەكاربهێنن.

روونیشیكردەوە: رێوشوێنی دواتر كاركردنە لەسەر بەكارهێنانی AI لە شیكردنەوەی داتاو بڕیاردان، هاوكات وەزارەت سەرنجی خستووەتەسەر بەكارهێنانی تەكنەلۆژیاكانی AI بۆ پڕۆسێسكردنی ئەو داتا سێتە نیشتمانییە بەرفراوانانەی كە لە سەرژمێری ساڵی 2024دا تۆماركرا و گۆڕینیان بۆ نیشاندەری ورد كە یارمەتیدەرن لەئامادەكردنی پلانی پەرەپێدان، دەستنیشانكردنی ئەولەوییەتەكانی وەبەرهێنان، پاشان پاڵپشتیكردنی بڕیاردان لەگەڵ دەرەنجامە وردەكان كە هاوتەریبن لەگەڵ رۆڵی وەزارەتی پلاندانان.

 PUKMEDIA