ئەنجومەنی نوێنەران كێشەی هەناردەكردنەوەی نەوت تاوتوێ دەکات

فەرمانگەی راگەیاندنی ئەنجومەنی نوێنەران

کۆبوونەوەیەکی پیشووی ئەنجومەنی نوێنەرانی عیراق

ئەنجومەنی نوێنەرانی عیراق لەبارەی كێشەی هەناردەكردنی نەوت لە نێوان هەولێر و بەغداد بە ئامادەبوونی وەزیری نەوتی عیراق و وەزیری سامانە سروشتییەكانی هەرێم كۆدەبێتەوە.

بڕیارە ئێوارەی ئەمڕۆ 17ی3ی2026، ئەنجومەنی نوێنەرانی عیراق كۆببێتەوە بۆ گفتوگۆ لەسەر كێشەی هەناردەی نەوتی عیراق بۆ بەندەری جەیهان لە رێگەی بۆری نەوتی هەرێمەوە، بە پێی كارنامەی كۆبوونەوەكەش بریكاری وەزارەتی نەوتی عیراق و وەزیری سامانە سروشتییەكانی هەرێمی کوردستان و بەڕێوەبەری گشتی كۆمپانیای بە بازاڕكردنی نەوت ناسراو بە سۆمۆ بانگهێشتی كۆبوونەوەكە کراون.

هەر بەپێی کارنامەی دانیشتنەکە، ئامانجی كۆبوونەوەكە بۆ گفتوگۆكردنە لەسەر چۆنییەتی هەناردەكردنی نەوت لە رێگەی بۆری كەركوك-جەیهان و نەهێشتنی ئاستەنگەكان و چارەسەركردنی ئەو قەیرانە داراییەی بەهۆی هێرشەكانی سەر عیراق دروستبووە.

 ئەمەش لەکاتێکدایە، عیراق داوای لە هەرێمی کوردستان کردووە، لەرێگەی بۆری نەوتی هەرێمەوە، نەوت هەناردە بکات، بەڵام هەرێمی کوردستان داواکەی رەتکردووەتەوە و مەرجی هەیە، وەزارەتی نەوتیش رەتکردنەوەکە بە سیاسی و حزبی دەزانێت و سامانە سروشتییەکانی هەرێمیش، وەزارەتی نەوت بە شێواندنی راستییەکان تۆمەتبار دەکات.

PUKMEDIA