قوباد تاڵەبانی: چالاكییە كلتووری و رۆشنبیرییەكان زیاتر دەبوژێنینەوە

راگەیاندنی قوباد تاڵەبانی

قوباد تاڵەبانی دەزگای چاپ و بڵاوكردنەوەی سەردەمی بەسەركردەوە

قوباد تاڵەبانی رایدەگەیەنێت: لەمەودا بە هاوكاری لەگەڵ سەردەم و دەزگاو ناوەندەكانی دیكە، هەوڵی زیاتر دەدەین بۆ بووژانەوەو بەهێزتركردنی چالاكییە كلتووری و رۆشنبیرییەكان و سلێمانی وەك پایتەختی رۆشنبیری نەك لەسەر ئاستی كوردستان، بەڵكو لەناوچەكەدا دەكەینە پێشەنگ.

قوباد تاڵەبانی، جێگری سەرۆكوەزیرانی هەرێم،‌ لەبەسەركردنەوەی دەزگای چاپ و بڵاوكردنەوەی سەردەم و دیدارم لەگەڵ ژمارەیەك نووسەرو رۆشنبیرە دیارەكانی سلێمانی رایگەیاند: شار تەنها بریتی نییە لەشەقام و بازاڕ و باڵەخانەكان، ئەگەر شەقام و باڵەخانەكان جەستەی شاربن، كلتوور و ئەدەب و چالاكییە هزری و رۆشنبیرییەكان روحی شارن.

راشیگەیاند: رۆژێك شەقام و باڵەخانەكان كۆن و لە كەڵك دەكەون، بەڵام كلتوور و هونەر و ئەدەب و هزر و بیرۆكە درەوشاوەكان، جیهانبینی و شێوازی ژیان و كردار و رەفتاری نەوەكان دیاری دەكەن.

قوباد تاڵەبانی راشیگەیاند: خۆشحاڵ بووم لەبەسەركردنەوەی دەزگای چاپ و بڵاوكردنەوەی سەردەم و دیدارم لەگەڵ ژمارەیەك لە نووسەر و رۆشنبیرە دیارەكانی سلێمانی و لەناویشیاندا بە تایبەتی مامۆستا رەئوف بێگەردی ئازیز كە لە زیاتر لە نیوسەدەی رابردوودا خزمەتی گەورەی بە ئەدەب و رۆشنبیری كوردستان كردووە. 
وتیشی: دەزگای سەردەم كە شانبەشانی ناوەندەكانی دیكە خزمەتی گەورەیان بە پێشخستنی بواری ئەدەب  و رۆشنبیری كردووە، ئەركی ئێمەیە پشتگیرییان بكەین و لەمەودا بە هاوكاری لەگەڵ سەردەم و دەزگا و ناوەندەكانی دیكە هەوڵی زیاتر دەدەین بۆ بووژانەوە و بەهێزتركردنی چالاكییە كلتووری و رۆشنبیرییەكان، چونكە سلێمانی وەك پایتەختی رۆشنبیری نەك لەسەر ئاستی كوردستان بەڵكو دەبێت لەناوچەكەدا پێشەنگ بێت.

PUKMEDIA