بانکی ناوەندی جیاوازیی نرخی دۆلاری کۆن و نوێ قەدەغە دەکات

PUKMEDIA

دۆلاری کۆن و نوێ

بەمەبەستی لابردنی بارگرانی سەر هاووڵاتیان، بانکی ناوەندی عیراق بە رەسمی بڕیاری لابردنی جیاوازی نرخی دۆلاری کۆن و نوێ دەدات، لەو بارەیەشەوە ئەندامێکی فراکسیۆنی یەکێتی دەڵێت: لە بەدواداچونەکانمان بەردەوام دەبین، هەتا جیاوازی نرخی دۆلاری کۆن و نوێ بەتەواوەتی لە بازاڕدا نەمێنێت.

د. بڕیار رەشید، ئەندامی ئەنجومەنی نوێنەرانی عیراق لە فراکسیۆنی یەکێتی بە PUKMEDIA ی رایگەیاند: دوای بەدواداچوون و کۆبوونەوەمان لەگەڵ عەلی عەلاق پارێزگاری بانکی ناوەندی عیراق، بە رەسمی بڕیاردراوە کە نابێت هیچ جیاوازییەک لە نێوان چاپی کۆن و نوێی دۆلاردا بکرێت، کە بەداخەوە لە بازاڕەکاندا بە شێوەیەکی هەڕەمەکی و بەنرخی جیاواز مامەڵەی پێوەدەکرێت و بارگرانی بۆ هاوڵاتیان دروستکردووە.

وتیشی: بانکی ناوەندی گشتاندنی بۆ سەرجەم بانک و نووسینگەکانی ئاڵوگۆڕی دراو کردووە کە شتێک نییە بەناوی "دۆلاری کۆن و نوێ" و دەبێت بە یەک نرخ مامەڵەیان پێوە بکرێت، وەرنەگرتنی دۆلار تەنها لە حاڵەتێکدایە کە پارەکە (دڕاو، شۆراو، یان بڕاو) بێت، نەک بەهۆی ساڵی چاپەکەیەوە.

د. بڕیار ئاماژەی بەوەش کردووە، سەرەڕای دەرچوونی ئەم رێنماییانە هێشتا لە بازاڕدا سەرپێچی دەکرێت، بۆیە بەردەوام دەبن لە چاودێریکردنی دۆسیەکە تا چارەسەری ریشەیی بۆ ئەم بارگرانییەی سەر هاووڵاتیان دەدۆزرێتەوە، هەر بانک یان کۆمپانیایەکیش پابەند نەبێت و جیاوازی لە نرخدا بکات، رێکاری یاسایی توندی بەرامبەر دەگیرێتە بەر.

PUKMEDIA


‏