دەستبەدابەشکردنی مووچە دەکرێت

PUKMEDIA

پەنجا هەزاری عیراقی

چاوەڕوان دەکرێت ئەمڕۆ حکومەتی عیراق تەواوکاری تەمویلی مووچەی مانگی شوبات بخاتە سەر هەژماری بانکی وەزارەتی دارایی هەرێم و لە سبەینێوە دەستبەدابەشكردنی مووچەی فەرمانبەرانی هەرێم بکرێت.

بەپێی راگەیەندراوێکی وەزارەتی دارایی هەرێم، وابڕیارە ئەمڕۆ حکومەتی عیراق تەواوی تەمویلی مووچەی مانگی شوبات بخاتە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عیراق.

ئەمەش لەکاتێکدایە رۆژی پێنج شەممە بڕی (٢٧٤ ) ملیارو ( ٩٦٢ ) ملیۆن دینار بە چوار گوژمە وەک بەشێک لە تەمویلی مووچەی مانگی شوباتی مووچەخۆرانی هەرێم کە بریتیە لە تەمویلی مووچەی مانگی شوباتی خانەنشینان و سودمەندانی چاودێری کۆمەڵایەتی و فەرمانبەرانی گرێبەست و مینحەی زیندانیانی سیاسی ، خرایە سەر هەژماری بانکی وەزارەتی دارایی و ئابوری هەرێم.

بەپێی زانیارییەکانی ـPUKMEDIA ، لەگەڵ ناردنی تەواوکاری مووچە کە بڕەکەی زیاتر لە ٧٠٠ ملیار دینارە، وەزارەتی دارایی ڕاستەوخۆ لیستی مووچە بڵاودەکاتەوە کە بەئەگەری زۆرە ئەمڕۆ دەبێت.

هاوکات بەشێكی خانەنشینان ئاگادار کراونەتەوە، کە سەردانی بانك نەكەن و لە رێگەی (ATM)ـەکانەوە بە پرۆسەی هەژماری من مووچەی مانگی دوو وەربگرن.