قوباد تاڵەبانی : هەیکەلی حزبەکەمان لەگەڵ چاوەروانییەکانی جەماوەر دەگونجێنین

راگەیاندنی قوباد تاڵەبانی

سەردانی قوباد تاڵەبانی بۆ مەڵبەندی یەکی رێکخستن

قوباد تاڵەبانی سەرپەرشتیاری مەکتەبی سکرتارییەتی سەرۆک مام جەلال سەردانی مەڵبەندی ١ی سلێمانی یەکێتیی کرد و لەگەڵ سەرکەوت زەکی سەرپەرشتیاری مەڵبەند و ژمارەیەک لە جێگران و کارگێڕان و کادیرانی مەڵبەندی سلێمانی کۆبووەوە.

لەو کۆبونەوەیەدا کە رۆژی یەکشەمە(8/3/2026) بەڕێوەچوو، قوباد تاڵەبانی دەستخۆشی لە سەرپەرشتیار و تەواوی ستافی مەڵبەند کرد، کە توانیویانە ئەرکەکانیان بە باشی راپەڕێنن و پەیوەندییەکی بەهێز لەگەڵ چین و توێژەکانی شارەکە دروست بکەن.

راشیگەیاند: نابێت لە هیچ دۆخێکدا لە کارکردن سارد ببنەوە، بەڵکو دەبێت رۆژ لە دوای رۆژ گڕوتینی زیاترتان هەبێت بۆ کارکردن و پێشخستنی زیاتری یەکێتی.

سەبارەت بە دۆخی ئێستای ناوچەکەش، قوباد تاڵەبانی رایگەیاند: ئێمە نابین بە بەشێک لەم جەنگە و لایەنگری ناکەین، بەڵام ئامادەین ببین بە بەشێک لە چارەسەر و لایەنگری ئاشتین، ئاماژەی بە وتەکانی سەرۆکی یەکێتی کرد لە کەناڵی فۆکس نیوز کە زۆر راشکاوانە لەسەر ئەم دۆخە قسەی کرد و سیاسەت و هەڵوێستی یەکێتیی روونکردەوە.

سەرپەرشتیاری سکرتارییەتی سەرۆک مام جەلال، لەبارەی گۆڕانکارییەکانی ناو یەکێتییشەوە رایگەیاند، دەمانەوێت هەیکەلی حزبەکەمان لەگەڵ چاوەروانییەکانی جەماوەر بگونجێنین، هەر بۆیە ئەم دۆخە کاریگەری نابێت لەسەر چاکسازی و گۆرانکارییەکانی ناو یەکێتیی، گۆڕانکارییەکانیش تەنیا گۆڕینی بەرپرس نین، بەڵکو گۆڕینی ئەرک و شێوازی کارکردنە، بۆ ئەوەی هەر هەڤاڵێک لەهەر پلە و پۆستێکدابێت دەبێت زۆرترین خزمەت بکات و بە باشترین شێوە سیاسەتی یەکێتی بباتە ناو خەڵکەوە.

 لە بەشێکی دیکەی کۆبوونەوەکەدا، قوباد تاڵەبانی رایگەیاند، مەڵبەندی سلێمانی مەڵبەندی دایکە و گرنگی خۆی هەیە، بەرنامەمان هەیە بۆ پیشخستنی سلێمانی لە هەموو بوارەکاندا، سلێمانی شارێکی دەوڵەمەندە بە کلتوور و دەمانەوێت لەمەودا گرنگی زیاتر بە بواری کلتوور و رۆشنبیری و کار و چالاکیی گەنجان بدەین.

PUKMEDIA