وته‌بێژی یه‌كێتی: ئامانجی سه‌رۆك بافڵ پاراستنی خاك و میلله‌ته‌كه‌مانه‌

PUKMEDIA

کاروان گەزنەیی

وته‌بێژی یه‌كێتیی نیشتمانیی كوردستان رایده‌گه‌یه‌نێت: له‌ئێستادا گه‌له‌كه‌مان شاهیدی جه‌نگێكی هه‌رێمییه‌، ئامانجی یه‌كێتی و سه‌رۆك بافڵ جه‌لال تاڵه‌بانیش پاراستنی خاك، هاووڵاتییان و میلله‌ته‌كه‌مانه‌.

كاروان گه‌زنه‌یی وته‌بێژی یه‌كێتیی نیشتمانیی كوردستان رایگه‌یاند: له‌ساڵیادی ڕ‌اپه‌ڕ‌ینه‌ مه‌زن و مێژووییه‌كه‌ی گه‌له‌كه‌ماندا، به‌ ڕ‌ێزو شانازییه‌وه‌ یادی ده‌كه‌ینه‌وه‌، كه‌ له‌ ٥/٣/١٩٩١ دا، به‌پێشڕ‌ه‌وی یه‌كێتی و خه‌ڵك له‌ رانیه‌ی ده‌روازه‌ی راپه‌ڕ‌ینه‌وه‌ وه‌رچه‌رخانێكی مێژوویان خوڵقاند، ده‌سكه‌وتی هه‌ره‌ گه‌وره‌ی ڕ‌اپه‌ڕ‌ین بریتی بوو له‌ دامه‌زراندنی حكومداریی هه‌رێم و چه‌سپاندنی ناسنامه‌ی سیاسی و ده‌ستوریی كورد له‌چوارچێوه‌ی عیراقی فیدراڵدا، ئه‌م ده‌سكه‌وتانه‌ش به‌ ئاسانی به‌ده‌ستنه‌هاتوون و پاراستنیشیان پێویستیی به‌ هۆشیاری و یه‌كڕ‌یزیی نیشتمانیی هه‌یه‌.

ده‌شڵێت: بۆیه‌ له‌م قۆناغه‌ هه‌ستیاره‌دا، به‌ ته‌بایی و یه‌كگرتوویی ئه‌ركی سه‌رشانمانه‌، له‌ به‌غداوه‌، به‌پشتبه‌ستن به‌ ده‌ستوور و یاساكان، هه‌وڵه‌كانمان چڕ‌ بكه‌ینه‌وه‌، بۆ ئه‌وه‌ی مافه‌ ده‌ستورییه‌كانی گه‌لی كورد زیاتر بچه‌سپێنین،  له‌هه‌مانكاتدا، پاراستنی ئه‌و ده‌سكه‌وتانه‌ی كه‌ به‌خوێن و قوربانی به‌ده‌ستهاتوون، پێویستی به‌ یه‌ك گوتاری و یه‌كڕ‌یزیی ناوخۆیی هه‌یه‌؛ ئه‌گه‌ر به‌ هه‌مان ڕ‌ۆحی ڕ‌اپه‌ڕ‌ین كار بكه‌ین، ده‌توانین هه‌م مافه‌كانمان بپارێزین و هه‌م به‌ره‌و قۆناغێكی باشتر بڕ‌ۆین.

كاروان گه‌زنه‌یی ئاماژه‌ بۆ ئه‌وه‌ش ده‌كات: یه‌كێتیی نیشتمانیی كوردستان، هه‌میشه‌ خۆی به‌ پارێزه‌ری به‌هاكانی ڕ‌اپه‌ڕ‌ین زانیوه‌، به‌تایبه‌ت له‌ئێستادا گه‌له‌كه‌مان شاهیدی جه‌نگێكی هه‌رێمییه‌، ئامانجی یه‌كێتی و سه‌رۆك بافڵ جه‌لال تاڵه‌بانیش پاراستنی خاك، هاووڵاتییان و میلله‌ته‌كه‌مانه‌.

PUKMEDIA