بەڕێوەبەری بازرگانی هەرێم: مەترسی نەمانی خواردن و پێداویستی رۆژانەمان نییە

PUKMEDIA

كۆنگرەی رۆژنامەوانی بەڕێوەبەری بازرگانی هەرێم و سەرۆكی ژووری بازرگانی سلێمانی

بەڕێوەبەری بازرگانی هەرێم و سەرۆكی ژووری بازرگانی و پیشەسازی سلێمانی كۆگاكانی خۆراكیان بەسەر كردەوەو دڵنیاییاندا لەبەردەستبوونی كاڵاو پێداویستی رۆژانەو رایانگەیاند: هیچ مەترسییەك نییەو داوا لەهاووڵاتیان دەكەین بازاڕەكان قەرەباڵغ نەكەن و بازرگانان نرخ بەرزنەكەنەوە، چونكە سزای دارایی و یاسایی دەدرێن.

نەوزاد غەفور، سەرۆكی ژوری بازرگانی و پیشەسازی سلێمانی، لەكۆنگرەیەكی رۆژنامەوانیدا رایگەیاند: كاڵاو شمەك و پێداویستی تەواوی رۆژانەی هاووڵاتیان لە كۆگاكاندا هەیەو لەچەند رۆژی داهاتوودا كاڵای دیكەش دەگەنە گەنجینەكانمان، بۆیە داوا لەهاووڵاتیان دەكەین كاڵای زۆر نەكڕن بۆئەوەی بەهەدەر نەچێت و نرخی پێداویستییەكانیش بەرز نەبنەوە.

راشیگەیاند: نابێت هاووڵاتیان ترس و دڵەڕاوكێیان لەكەمبوونەوەو گرانبوونی كاڵاو پێداویستی رۆژانە هەبێت، داواش لەبازرگانان دەكەین هەل نەقۆزنەوەو نرخەكان بەرز نەكەنەوە.

هەر لەكۆنگرەكەدا نەوزاد شێخ كامیل، بەڕێوەبەری گشتی بازرگانی هەرێم رایگەیاند: مانگی یەكەمی بەشەخۆراكی هاووڵاتیانمان دابەشكردووەو  بەشی مانگەكانی دووەم و سێیەمی بەشەخۆراكی هاووڵاتیانیش لە كۆگاكاندا ئامادەكراون، بۆیە  پێویست بە ترس و دڵەڕاوكێ ناكات.

راشیگەیاند: لەكۆگاكانی كەرتی تایبەتیشدا كاڵای زۆر لەبەردەستدان و بەردەوامیش كاڵای دیكە هاوردە دەكەین، بۆیە ترسی نەمانی پێداویستییەكانی رۆژانەو خواردن تەنها دەنگۆیەو ئەگەری روودانی نییە.

راشیگەیاند: لیژنەكانی چاودێری بازرگانی، بۆ چاودێری نرخی كاڵاو شمەك لەبازاڕدان و رێگەنادەین نرخ بەرزبكرێتەوە، بۆیە هیچ مەترسییەك نییەو داوا لەهاووڵاتیان دەكەین بازاڕەكان قەرەباڵغ نەكەن.

ئەوەشی خستەڕوو: بەپێی خەمڵاندنەكانمان بەدەر لەوبەشە خۆراكەی لەڕێگەی بریكارەكانمانەوە دابەشی دەكەین، ئەگەر تا شەش مانگی دیكەش كاڵا نەیەتە كۆگاكانمانەوە، مەترسی نەمانی پێداویستی رۆژانەمان نییە.

بەڕێوەبەری گشتی بازرگانی هەرێم راشیگەیاند: هەر بازرگان و خاوەن ماركێت و بازاڕێك نرخ بەرز بكاتەوە، سزا دەدرێت و سزاكانیشمان لە 50 هەزار دینارەوە دەستپێدەكات تاوەكو 5 ملیۆن دینار، هاوكات سزای داخستنی شوێنەكە لە سێ بۆ 10 رۆژەو پەڕاوی لێكۆڵینەوە بۆ سەرپێچیكار دەكرێتەوە.

وتیشی: رێگە نادەین زۆربوونی خواست لەسەر پێداویستییەكان وابكات كوالێی كاڵاكان دابەزن، بۆیە چاودێرییەكانمان بەردەوامەو تەنها لە 15 رۆژی مانگی رەمەزاندا زیاتر لە 67 تۆن خواردنی ماوەبەسەرچوو لەناوبراون و زیاتر لە 20 ملیۆن دینار سزای ئەو كەسانەمان داوە كە سەرپێچیان كردووە و لیژنەكانمان چاوكراوەن بۆ سزادانی سەرپێچیكاران.

وتیشی: داخستنی سنووری هەرێمی كوردستان و وڵاتی ئێران كاتییەو بەئاسایی بوونەوەی دۆخەكە سنوورەكان دەكرێنەوە، بەڵام تا ئەوكاتە كاڵا لەشوێنی دیكەوە هاوردە دەكەین.

ئەمەش لەكاتێكدایە، پێشتریش ژووری بازرگانی و پیشەسازی سلێمانی، دڵنیایی تەواوی بە هاووڵاتیان دا كە هیچ كێشەیەك لە دابینكردنی خۆراك و كاڵاكانی پێویستی رۆژانەدا نییە و هەموو جۆرەكانی خواردەمەنی و پێداویستییە سەرەكییەكان بەردەستن لە كۆگا و بازاڕ و ماركێتەكاندا.

PUKMEDIA