شەپۆلێکی بەفر و باران هەرێمى کوردستان دەگرێتەوە

istockphoto

بەفر بارین

شەپۆلێکی بەفر و باران بە دوو قۆناغی جیاواز ناوچەکانی هەرێمی کوردستان دەگرێتەوە و پلەی گەرمی 3 بۆ 5 پلەی سیلیزی دادەبەزێت.

پێشبینى دەکرێت شەپۆلێکی بەفر و باران بە دوو قۆناغی جیاواز ناوچەکانی هەرێمی کوردستان بگرێتەوە، بە شێوەیەک قۆناغی یەکەم لە ئێوارەی ئەمڕۆ چوارشەممە دەستپێدەکات و بارانبارین سەرەتا لە ناوچەکانی ئیدارەی سەربەخۆی زاخۆ، پاشان پارێزگای هەولێر و ئیدارەی سۆران و راپەڕین و ناوچە شاخاوییەکانی هەولێر و موسڵ دەستپێدەکات.

هاوکات کاریگەریی شەپۆلەکە لە بەرەبەیانیی سبەی پێنجشەممە فراوانتردەبێت و دەگاتە ناوچەکانی سنووری پارێزگاکانی سلێمانی و کەرکوک و هەڵەبجە و ئیدارەی گەرمیان.

قۆناغی دووەمی شەپۆلەکە لە سەرەتای هەفتەی داهاتوو رۆژانى شەممە و یەکشەممە دەستپێدەکات، هەروەها پلەی گەرمی 3 بۆ 5 پلەی سیلیزی دادەبەزێت.

هەروەها بڕی بارانبارین بەپێی کات و شوێن دەگۆڕێت، لەناوچە شاخاوییەکانی دهۆک، هەولێر، سۆران و راپەڕین بارانەکەی لەنێوان نمەباران بۆ بارانی مامناوەند دەبێت زۆرترین بڕی باران لەو ناوچانە دەبارێت.

PUKMEDIA