باڵیۆزخانەی ئەمریكا لە بەغداد هۆشداری بە هاووڵاتیانی وڵاتەکەی دەدات

واع

باڵیۆزخانەی ئەمریكا لە بەغداد

باڵیۆزخانەی ئەمریكا لە بەغداد داوا لە هاوڵاتیانی ئەمریكی دەكات زۆر وریاو ئارام بن و سنور بۆ جموجوڵەكانیان دابنێن،دووپاتیشی دەکاتەوە هێشتا دۆخی ئەمنی ئاڵۆزەو ئەگەری هەیە بە خێرایی گۆڕانكاری بەسەردا بێت.

 باڵیۆزخانەی ئەمریکا لە بەغداد، لە راگەیەندراوێکیدا ئاماژەی بەوەکردووە: موشەك و درۆن لە بواری ئاسمانی عیراقدا هەیە و باڵیۆزخانەی ئەمریكا چاودێری هەڕەشەكان دەكات بۆسەر بەرژەوەندییەكانی ئەمریكا، لەناویاندا چێشتخانەو كۆمپانیاو تاكە كەسەكان.

راشیگەیاندووە: لە بەغداد خۆپیشاندان دژ بە ئەمریكا بەڕێوەدەچێت، ئەمە لەپاڵ بانگەواز بۆ خۆپیشاندان لە سەرتاسەری عیراق،بۆیە هاووڵاتیانی ئەمریكی وریاو بە ئاگا بن لەوەی لە دەوروبەریان هەیە و لەو گردبوونەوە گەورانە دوربكەونەوە.

باڵیۆزخانەی ئەمریکا هۆشداریشی داوە، بەوەی رەنگە خۆپیشاندانەكان سەربكێشن بۆ كردەوەی توندوتیژی و هێشتا دۆخی ئەمنی ئاڵۆزەو ئەگەری هەیە بە خێرایی گۆڕانكاری بەسەردا بێت.

ئاشکراشی دەکات، لەئێستادا كاری كونسوڵگەرییەكانیش هەڵپەسێردراوە، بە خزمەتگوزارییە رۆتینییەكانی هاووڵاتیانی ئەمریكیشەوە.

باڵیۆزخانەی ئەمریکا، لە کۆتایشدا رایگەیاندووە: باڵیۆزخانەی ئەمریكا لە بەغداد و كونسوڵگەرییەكەی لە هەولێر بە كراوەیی دەمێننەوەو جوڵە تێیاندا تەنیا بۆ كارە پێویستەكان دەبێت.

PUKMEDIA