پلەی گەرمی لە مانگی شوباتى ئەمساڵدا 3.5 پلە گەرمتر بووە

kerala kaumudi

باران بارین و پلەى گەرمى

بەڕێوەبەرایەتی كەشناسی و بومەلەرزەزانی سلێمانى، ئامارێکى بڵاوکردەوە و رایگەیاند: بەراورد بە تێكڕای ساڵانەی پلەی گەرمی لە مانگی شوباتدا ئەمساڵ 3.5 پلە گەرمتر بووە و بڕى بارانیش بەراورد بە تێكڕای بارینی ساڵانە لە مانگی شوباتدا ئەمساڵ نزیكەی 20 ملم كەمتر بووە.

ئەمڕۆ بەڕێوەبەرایەتی كەشناسی و بومەلەرزەزانی سلێمانى بڵاویکردەوە: بەپێی داتا تۆماركراوەكانی وێستگەی كەشناسی سلێمانی لە مانگی شوباتی ئەمساڵدا نزمترین پلەی گەرمی تۆماركراو 1.5 °C و بەرزترین پلەی گەرمی 24.0 °Cبووە، هەروەها تێكڕای پلەی گەرمییش لەم مانگەدا 11.7 °C بووە كە بەراورد بە تێكڕای ساڵانەی پلەی گەرمی لە مانگی شوباتدا ئەمساڵ 3.5 پلە گەرمتر بووە.

ئاماژەى بە ئەوەشدا: بڕی بارانی مانگی شوباتی ئەمساڵ 90.6 ملم بووە، كە بەراورد بە تێكڕای بارینی ساڵانە لە مانگی شوباتدا ئەمساڵ نزیكەی 20 ملم كەمتر بووە، كۆی گشتی بارینیش تاكو ئەمڕۆ 609.9 ملیمە.

PUKMEDIA