پسپۆڕێكی عیراقی: سه‌رسامم به‌خزمه‌تگوزارییه‌كانی نه‌خۆشخانه‌ی هیوا

تەندروستیی سلێمانی

د.ئەحمەد ساڵح ئەحمەد پزیشكی ڕاوێژكاری نەشتەرگەری شێرپەنجە

هۆڵی نەشتەرگەری شێرپەنجە لە نەخۆشخانەی جەمالی حاجی عەلی كرایەوە، بەرێوەبەرایەتی گشتی تەندروستی سلێمانیش رایدەگەیەنێت: هەموو جۆرەكانی نەشتەرگەری شێرپەنجە بۆ تووشبوانی شێرپەنجە، لە نەخۆشخانەکە بەبێ بەرامبەر ئەنجام دەدرێت و پزیشکێکی عیراقیش سەرسامی خۆی بە خزمەتگوزارییە تەندروستییەکانی نەخۆشخانەی هیوا دەردەبڕێت.


د.سەباح نەسرەدین بەرێوبەری گشتی تەندروستی سلێمانی بە یاوەری( د.یاد نەقشبەندی) بەرێوبەری نەخۆشخانەی هیوا و ژمارەیەك لە بەرپرسانی كەرتی تەندروستی، سەردانی نەخۆشخانەی جەمالی حاجی عەلی كرد و هۆڵی نەشتەرگەری شێرپەنجەی لە نەخۆشخانەكە كردەوە.

بڕیارە لەمەودوا لەسەر ڕاسپاردەی بەڕێوبەری گشتی تەندروستی سلێمانی ڕۆژانە و بە بەردەوامی هەموو جۆرەكانی نەشتەرگەری شێرپەنجە لە نەخۆشخانەی جەمالی حاجی عەلی بۆ تووشبوانی شێرپەنجە بەبێ بەرامبەر ئەنجام بدرێت بەتایبەت نەشتەرگەری شێرپەنجەی مەمك.

 هاوکات، د.ئەحمەد ساڵح ئەحمەد پزیشكی ڕاوێژكاری نەشتەرگەری شێرپەنجە سەرسامی خۆی دەربڕی بە پێشكەوتنەكانی نەخۆشخانەی هیوا لەشاری سلێمانی و ئەو خزمەتگوزارییانەی لەو نەخۆشخانەیە پێشكەشی تووشبووانی شێرپەنجە دەكرێن.

ئەو پزیشكە عیراقیە دەڵێت:" لە سەردانێكیاندا بۆ نەخۆشخانەی هیوا پێشكەوتنێكی سەردەمیانەیان بەدیكردووە لە ڕووی خزمەتگوزارییە تەندروستیەكان كە بە ئاستێكی بەرز پێشكەش دەكرێن و ئەوەش بەڵگەیە لەسەر پێشكەوتنی كەرتی تەندروستی لە سلێمانی".

PUKMEDIA