دەزگای ئاسایشی هەرێم: گروپێکی مەترسیداری چەکداری هەڵوەشێندرایەوە

PUKMEDIA

لۆگۆی دەزگای ئاسایش

دەزگای ئاسایشی هەرێم، هەڵوەشاندنەوەی گرووپێکی مەترسیداری چەکداری داعش بەناوی (کەتیبەی پێنجی سەلمانی فارسی) سەر بە ویلایەتی کوردستان ڕادەگەیەنێت.

بەڕێوەبەرایەتی گشتی ئۆپراسیۆنەکانی ئاسایش لە راگەیەندراوێکیدا، ئاماژەی بەوەکردووە: بەهەماهەنگی دەزگای ئاسایشی نیشتمانی عیراق،لەسەر بنەمای زانیاری هەواڵگری و ئەنجامی لێکۆڵینەوەکان لەماوەی 8ی12ی2025 تا رۆژی 9ی2ی2026 توانییان، چەند ئۆپراسیۆنیک بۆ دەستگیرکردنی تیرۆریستان لەسنووری (هەڵەبجە، سەیدسادق،پێنجوێن، گەرمیان، دیالە) ئەنجام بدەن.

دەزگای ئاسایشی هەرێم،پیلانی چەکدارانی داعش کەتیبەی پێنجی سەلمانی فارسی سەر بە ویلایەتی کوردستانی ئاشکرا کردووە، کە بریتی بووە لە:
-خۆ ڕێکخستنەوە و درووستکردنی گرووپی تیرۆریستی
-درووستکردنی شوێنی مانەوە(المضافة)
-گواستنەوەی چەکدارانی داعش لەوڵاتانی دراوسێ بۆ کوردستان و خوارووی عێراق.

دەزگای ئاسایش راشیگەیاندووە: لەکۆی ئەم چالاکییەدا، یەک کارمەندی دەزگای ئاسایشی هەرێم برینداربوو.

پەیوەست بە دەستگیرکردنی تیرۆرستەکان و دەستگرتن بەسەر چەکەکانیان، دەزگای ئاسایشی هەرێم ئاشکرای کرد: توانرا 10 تیرۆریست دەستگیربکرێت و دەستیشگیرا بەسەر (8 چەک و 1 دەمانچە و 2 بۆمبی دەستی و ماددەی تەقینەوە لەجۆری سیفۆر و دوربین و پشتێنی خۆکوژی).

لە کۆتایشدا، دەزگای ئاسایشی هەرێمی کوردستان، رایگەیاندووە: لەئێستادا سەرجەم تیرۆریستان بە ماددەی(4) تیرۆر، ڕاگیراون و لێکۆڵینەوە لە دۆسییەکانیان بەردەوامە.

PUKMEDIA