شاسوار عەبدولواحید: ئامانج لەرێككەوتنمان لەگەڵ یەكێتی خزمەتی خەڵكە

PUKMEDIA

شاسوار عەبدولواحید سەرۆكی جوڵانەوەی نەوەی نوێ

ئەمڕۆ 17ی 2ی 2026، وەفدی باڵای یەكێتیی نیشتمانیی كوردستان، بەسەرۆكایەتی بافڵ جەلال تاڵەبانی و وەفدی جوڵانەوەی نەوەی نوێ بەسەرۆكایەتی شاسوار عەبدولواحید كۆبوونەوەو دوای كۆبوونەوەش شاسوار عەبدولواحید رایگەیاند: ئامانجی سەرەكیمان لەرێككەوتن لەگەڵ یەكێتی خزمەتكردنی خەڵكە، هاوكات رێككەووتنەكە بۆ هەرێم و بەغدادەو گشتگیرە. وتیشی: پشتیوانیی لە كاندیدی یەكێتی بۆ پۆستی سەرۆككۆمار دەكەین.

شاسوار عەبدولواحید سەرۆكی جوڵانەوەی نەوەی نوێ، لەدوای كۆبوونەوەكە، لەكۆنگرەیەكی رۆژنامەوانیدا رایگەیاند: رێككەوتنەكەمان لەگەڵ یەكێتی لەسەر شێوازی حكومڕانیی و پێكهێنانی حكومەتی نوێ و جێبەجێكردنی ئەو پڕۆژە چاكسازیانەیە كەخراونەتەڕوو، كەئەگەر جێبەجێ بكرێن لەبەرژەوەندی خەڵكی كوردستانە.

وتیشی: رێككەووتنەكەمان لەگەڵ یەكێتیی نیشتمانیی كوردستان، گشتگیرەو بۆ هەرێم و بەغدادە، وەك جولانەوەی نەوەی نوێ پشتیوانی لەكاندیدی یەكێتیی نیشتمانیی كوردستان بۆ پۆستی سەرۆككۆماری عیراق دەكەین.
 
راشیگەیاند: ئەگەر بەهەردوولا فراكسیۆنێكی بەهێز دروستبكەین، ئەوكاتە بەناوی 38 بۆ 40 كورسییەوە قسەدەكەین و هاوسەنگی هێز بۆ هەرێم دەگەڕێنینەوە، دەتوانین حكومەتێك پێكبهێنین كەژیانی خەڵك باشتر بكات.

شاسوار عەبدولواحید راشیگەیاند: كۆبوونەوەكەمان لەگەڵ یەكێتی باش بووەو هەر ئەم هەفتەیە كۆبوونەویەكی دیكە لەسەر ئاستی مەكتەبی سیاسی ئەنجامدەدەین و سەرجەم رێككەوتنەكە دەنووسینەوە، چونكە دەمانەوێت نێو ماڵی كورد رێكبخەينەوەو شكۆ بۆ دامەزراوەكانی حكومەت بگەڕێنينەوە.

وتیشی: لەڕێگەی ئەو بانگەوازەی كە كردوومانە، جگە لەوەی هەندێك پەرلەمانتار لەسەر ئاستی شەخسی پشتیوانی هاوپەیمانێتییەكەمان دەكەن، هاوكات دەمانەوێت لایەنەكانی دیكەش پشتگیریمان بكەن بۆ ئەوەی حكومەتێكی خزمەتگوزار پێكبهێنین.

PUKMEDIA