کوەیت پشتگیری لە عیراقێکی سەقامگیر و بەهێز دەکات

راگەیاندنی قوباد تاڵەبانی

قوباد تاڵەبانی و باڵیۆزی کوەیت لە عیراق

قوباد تاڵەبانی، جێگری سەرۆکوەزیران پێشوازیکرد لە حەسەن محەمەد ئەلزەمان، باڵیۆزی کوەیت لە عیراق و پێکەوە لەبارەی چۆنییەتی بەهێزترکردنی پەیوەندییەکانی نێوان هەردوولا گفتوگۆیان کرد.

لە کۆبوونەوەکەدا کە رۆژی پێنج شەمە(12/2/2026)  بە ئامادەبوونی عوسمان ئەلداوود، کونسوڵی گشتیی کوەیت لە هەرێم بەڕێوەچوو، بە گرنگییەوە باس لەو پەیوەندییە مێژووییەی نێوان هەردوولا کرا و جەختکرایەوە لەسەر پێویستیی بەهێزترکردنی پەیوەندییەکان لە بوارە جیاوازەکاندا و بە تایبەتیش لە بوارەکانی ئابووری و بازرگانیدا.

لە کۆبوونەکەدا باڵیۆزی کوەیت خواستی وڵاتەکەی بۆ پەرەپێدانی پەیوەندییەکانی لەگەڵ هەرێمی کوردستان دەربڕی. لەم چوارچێوەیەدا جیگری سەرۆکوەزیران بە ئاماژەدان بە سیاسەتی حکومەتی هەرێمی کوردستان بۆ پشتگیریکردن لە وەبەرهێنانی بیانی، رایگەیاند دەرفەتی زۆر گەورە بۆ کۆمپانیا و وەبەرهێنەرانی کوەیتی هەیە بۆ بەشداریکردن لە پرۆسەی گەشەپێدانی کوردستان و حکومەتی هەرێمیش ئامادەیە بۆ پێشکەشکردنی هەموو جۆرە پشتگیری و کارئاسانییەک.

سەبارەت بە دۆخی ناوچەکە و عێراقیش، هەردوولا هاوڕابوون لەسەر گرنگیی پێکەوەکارکردنی هەموو لایەنە ناوخۆیی و نێودەوڵەتییەکان بۆ پاراستنی سەقامگیری ناوچەکە و بە تایبەتیش عیراق, لەمبارەیەوە باڵیۆزی کوەیت ئاماژەی بەوەکرد کوەیت وەک وڵاتێکی دراوسێ، پشتگیری لە عیراقێکی سەقامگیر و بەهێز و گەشەسەندوو دەکات.

PUKMEDIA