(المرصد) خەرمانی ساڵێکی بڵاو دەکاتەوە

PUKMEDIA

خەرمانی ساڵێکی المرصد

لە ساڵیادی دەرچوونی یەکەم ژمارەیدا، گۆڤاری المرصد کە بە زمانی عەرەبی دەردەچێت، کۆ خەرمانی ساڵێکی لەسەر دیسکی کۆمپیوتەر بڵاوکردەوە، کە زیاتر لە حەوت هەزار لاپەڕە لەخۆ دەگرێت و دۆسیە گرنگەکانی هەرێمی کوردستان و عیراق و ناوچەکە لەخۆ دەگرێت.

 پڕۆژەیەکی بەڵگەنامەییە

ئەم دەستپێشخەرییە، تەنها بڵاوکراوەیەکی رووکەشی نییە، بەڵکو پڕۆژەیەکی تەواو بەڵگەنامەییە، کە کۆی بەرهەمی ساڵێک لە ڕووداوەکان و شیکاری و توێژینەوەکان لە دیسکێکی کۆمپیوتەریدا کۆدەکاتەوە و دەیخاتە بەردەست خوێنەرەکان وەک سەرچاوەیەکی زانستی و سیاسی.

ئەم بڵاوکراوەیە، کۆی خەرمانی ساڵی 2025 دەگرێتەوە، کە ساڵێکی پڕ بوو لەڕووداو و گۆڕانکارییە خێراکان لە ناوچەکە و جیهان.

 بڵاوکردنەوەی کۆخەرمانەکان لەکاتێکدایە، کە بیرگەی بەڵگەنامەکان وردە وردە کەمدەبێتەوە، بۆیە گرنگ و پێویستە لە بەرهەمێکدا کۆبکرێنەوە، کە گرنگییەکی زۆری هەیە بۆ تێگەیشتن لەو رووداوانەی کە لە ساڵی رابردوودا روویانداوە.

لە دیسکێکی کۆمپیوتەر (CD)دا کۆکراوەتەوە

کارەکەی المرصد، بە پڕۆژەیەکی دەگمەن دادەنرێت لەسەر ئاستی ناوچەکە، چونکە لەبری پشت بەست بە رووماڵی رووداوەکانی رۆژ  و لەو بیرچوونەوە، بەرهەمە ڕۆژنامەوانی و شیکارییەکان کراوە بە ئەرشیف و لە دیسکێکی کۆمپیوتەريی(CD)دا کۆکراوەتەوە.

بەرهەمەکانی ساڵی 2025 لە ناو حەوت دۆسییەدا کۆکراونەتەوە، کە لەسەرەتای ساڵەوە دەست بە ئەرشیفکردنی بابەتەکان کراوە و حەوت هەزار و 200 لاپەڕەی شیکاری هەواڵ و بابەتی بەڵگەنامەیی لەخۆ دەگرێت.

حەوت دۆسیە لەخۆ دەگرێت

کە بەم شێوازەی خوارەوەیە:
دۆسیەی عیراق و هەرێمی کوردستان (2390 لاپەڕە)
دید و بۆچوونەکان دەربارەی عیراق (698 لاپەڕە)
دۆسیەی تورکیا (1044 لاپەڕە)
دۆسیەی سوریا (772 لاپەڕە)
دۆسیەی ئێران (378 لاپەڕە)
وەرگێڕانەکانی المرصد (1004 لاپەڕە)
توێژینەوە و دیدەکان دەربارەی کێشە جیهانییەکان (840 لاپەڕە).

دۆسیەی عیراق و هەرێمی کوردستان گرنگترین بەشە

دۆسیەی عیراق و هەرێمی کوردستان، بە گەورەترین و هەستیارترین دۆسیەکانی المرصد دادەنرێت، چونکە عیراق ناوەندی هاوکێشەکانی ناوچەکەیە و  لەم بەشەدا باس لە بارودۆخی سیاسی و ئابوری و ئەمنی عیراق و هەرێمی کوردستان کراوە، هاوکات کۆمەڵێک وتار و توێژینەوەی فکریش بڵاوکراوەتەوە.

لەلایەکی دیکەوە، دۆسیەی تورکیا و سوریا و ئێران و وەرگێڕان بۆ زمانی عەرەبی و بڵاوکردنەوەی لە گۆڤارەکە، بەشێکی دیکەی ئەم ئەرشیفە گرنگە پێکدەهێنن، کە کۆی گشتیان دەگاتە حەوت هەزار و 200 لاپەڕە، لە بابەتی شیکاری و بەڵگەنامە.

ئەمەش لەکاتێکدایە، المرصد ماوەی 32 ساڵە لەکارەکانی بەردەوامە و بۆ هەموو لایەکی سەلماندووە، کە جێگای متمانەی خوێنەرەکانیيەتی، هەروەها بەخۆ گونجاندنی لەگەڵ گۆڕانکارییەکانی سەردەم، توانیویەتی بە پێشەنگی بمێنیتەوە.

PUKMEDIA