بەهای دۆلار هاوشێوەی دۆخی عیراق ناجێگیرە

PUKMEDIA

دۆلارو دینار

نرخی دۆلار 151 هەزار دیناری تێپەڕاندو شارەزایەكی ئابوریش رایدەگەیەنێت: ناسەقامگیری سیاسی رۆژهەڵاتی ناوەڕاست و پێكنەهێنانی حكومەتی نوێی عیراق هۆكاری سەرەكی بەرزبوونەوەی نرخی دۆلارن.

شوان هادی، شارەزای ئابوری و خاوەنی نووسینگەی ئاڵوگۆڕی دراو، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: سەرەڕای ئەوەی بانكی ناوەندی عیراق، دڵنایی لەجێگیری بەهای دۆلار بەرامبەر بەدینار داوە، بەڵام ئەمڕۆ 12ی 2ی 2026، نرخی دۆلار بەرزبوونەوەیەكی بەرچاوی بەخۆیەوە بینی، بەشێوەیەك  100 دۆلاری ئەمریكی گەیشتە 151 هەزارو 500 دینار.

راشیگەیاند: بەشێوەیەكی گشتی هۆكاری بەرزبوونەوەی خێرای دۆلار بەرامبەر بەدینار،  بۆ ناسەقامگیری سیاسی رۆژهەڵاتی ناوەڕاست و پێكنەهێنانی حكومەتی نوێی عیراق و یەكلا نەبوونەوەی پۆستەكانی سەرۆكوەزیران و سەرۆككۆماری عیراق دەگەڕێتەوە، هاوكات ژمارەیەك بازرگانیش ناجێگیری دۆخەكەیان قۆستووەتەوەو یاری بە نرخی دۆلار دەكەن.

ئاماژەی بەوەشكرد: پێشبینی دەكەین بە پێكهێنانی حكومەتی نوێی عیراق و ئارامبوونەوەی دۆخی سیاسی ناوچەكە، بەهای دۆلاریش بەرامبەر بەدیناری عیراقی روو لەنزمبوونەوە و جێگیربوون بكات.

ئەمەش لەكاتیكدایە، لەچەند رۆژی رابردوودا عەلی عەلاق، پارێزگاری بانكی ناوەندی عیراق رایگەیاند: بەهای دۆلار جێگیرەو هیچ گۆڕانكارییەك لەنرخەكەیدا نەكراوە، هەر بەرزبوونەوەیەكیش رووبدات لەلایەن بانكی ناوەندییەوە نییەو پەیوەندی بەخواست و خستنەڕوی دۆلارەوە هەیەو دۆخێكی كاتییە.

PUKMEDIA