کۆبونەوەى هاوپەیمانی ئیدارەی دەوڵەت بە ئامادەبوونى سەرۆک بافڵ بەڕێوەچوو

راگەیاندنى نوسینگەى سەرۆک وەزیرانى عیراق

وێنەیەکى کۆبوونەوەکە

هاوپەیمانی ئیدارەی دەوڵەت بەئامادەبوونی  بافڵ جەلال تاڵەبانى سەرۆكی یەكێتی  و سەرۆك كۆماری عیراق لە بەغداد بۆ تاوتوێكردنی چەند دۆسێیەكی ناوخۆیی و ناوچەیی و نێودەوڵەتی كۆبووەوە.

بەپێی راگەیەندراوی كۆبوونەوەكە، هاوپەیمانی ئیدارەی دەوڵەتی بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان و د.لەتیف رەشید سەرۆك كۆماری عیراق لە بەغداد كۆبووەوە و تیایدا پێشوازی لە دانووستانەكانی ئەمریكا و ئێران بە نێوەندگیری عومان كرا و جەختیشكرایەوە لە پشتبەستن بە دیالۆگ بۆ چارەسەركردنی ناكۆكییەكان و خۆبەدوورگرتن لە هەر لێدوانێكی میدیایی و هەڵوێستێك كە بەرژەوەندییەكانی عیراق بخاتە مەترسییەوە.

ئیدارەی دەوڵەت تیشكی خستەسەر، گرنگی پشتیوانیكردنی حكومەت بۆ چاكسازییە ئابورییەكان و ئەو بڕیارانەی پەیوەستن بە دەروازە سنوورییەكان، رێگریكردن لە قاچاخ و خۆدزینەوە لە باج و گومرگ، جەختیشیكردەوە لە گرنگی پلانێكی چاكسازی بۆ پاراستنی بەرهەمەكانی ناوخۆ و بەرەوپێشبردنی كەرتی پیشەسازیی عیراق.

لەبەشێكی دیکەی كۆبوونەوەكەدا، گواستنەوەی تیرۆریستانی داعش لە سوریاوە بۆ عیراق تاوتوێكرا و جەختكرایەوە لە پشتیوانیكردنی رێككارە یاسایی و دادوەرییەكانی حكومەت بەرانبەر ئەو تیرۆریستانە، داواشی لە كۆمەڵگەی نێودەوڵەتی كرد پشتیوانی عیراق بكات لەو پرسەدا.

PUKMEDIA