د. یوسف گۆران: داتای ژینگەو ئاستی وەبەرهێنان لەسلێمانی دڵخۆشكەرە

PUKMEDIA

د. یوسف گۆران، لێپرسراوی مەڵبەندی دیراساتی گشتی یەكێتی

د. یوسف گۆران رایدەگەیەنێت: داتای دڵخۆشكەر سەبارەت بە ژینگە و ئاستی وەبەرهێنان لە سنوری پارێزگای سلێمانی هەیە، بەشێوەیەك تەنها لەساڵی 2025 دا  زیاتر لە دوو ملیار دینار سەرمایە لە 55 پڕۆژەی هەمەجۆردا خراوەتەگەڕ، راكێشانی سەرمایەو دروستكردنی ژینگەیەكی ئارام بۆ وەبەرهێنان سیاسەتێكی نیشتمانییە و رۆڵی سەرەكی لە گەشەسەندنی ئابوری و كۆمەڵایەتی دەبینێت.

د. یوسف گۆران، لێپرسراوی مەڵبەندی دیراساتی گشتی یەكێتیی نیشتمانیی كوردستان رایگەیاند: لە لێكۆڵینەوەكانم دەربارەی دۆخی گەشەسەندنی ئابوری هەرێمی كوردستان و عیراق لەم 10 ساڵەی كۆتایدا، دوای وەرگرتنی داتاكانی تایبەت بە سلێمانی لەم چەند ساڵەدا چەندین داتای دڵخۆشكەرم لەسەر ژینگە و ئاستی وەبەرهێنان لە سنووری پارێزگای سلێمانی، بە تایبەت لە ساڵی 2025، بۆ دەركەوت.

راشیگەیاند: بەپێ ئەو داتایانە لەساڵی 2025 دا دوو ملیارو 28 ملیۆن و 960 هەزارو 487 دینار، سەرمایە وەك وەبەرهێنان هاتووەتە سنوری پارێزگای سلێمانی كە لە 55 پڕۆژەی هەمەجۆر بەرجەستە بووە، لەوەش گرنگتر ئەوەیە كە كەرتی پیشەسازی بەشێكی گرنگی ئەم پڕۆژانەیە كە بڕەكەی 752 ملیۆن دۆلارە. ئەم داتایە گەر بەراوردی بكەین لەگەڵ 10 ساڵی پێشوی وەبەرهێناندا جیاوازییەكی زۆر و بەرچاوی تێدا دەبینی.

ئەوەشی خستووەتەڕوو: ئەم داتایانە ئەوەمان پێ دەڵێن، ژمارە و بڕی وەبەرهێنان و راكێشانی سەرمایە بۆ ئەم پارێزگایە بەرەو پێشچونێكی گەورەی، لە چاو ساڵانی پێشو، بەخۆوە بینیوە، كە بێگومان بووەتە هۆی دروستكردنی هەزاران هەلی كار.

د. یوسف گۆران ئاماژەی بەوەشكردووە: راكێشانی سەرمایەو بەگەڕخستن و دروستكردنی ژینگەیەكی ئارام بۆ وەبەرهێنان سیاسەتێكی نیشتمانییە و رۆڵی سەرەكی لە گەشەسەندنی ئابوری و كۆمەڵایەتی دەبینێ، ئەم هەنگاوە پێویستە دەستخۆشی و پاڵپشتیلێبكرێت و بكرێتە ئاڕاستەیەكی بەردەوام بۆ خزمەتكردنی زیاتری كوردستان و خەڵكەكەی.

PUKMEDIA