قوباد تاڵەبانی: كۆمەڵگای نێودەوڵەتی گەرەنتی مافەكانی كورد لەسوریا بكات

راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ كونسوڵی گشتیی بەریتانیا

قوباد تاڵەبانی، جێگری سەرۆكوەزیران پێشوازیكرد لە ئەندرۆ بیزڵی، كونسوڵی گشتیی بەریتانیا لە هەرێم و پێكەوە تاوتوێی چەند پرسێكی جێی بایەخی هەردوولایان كرد.

لە كۆبوونەوەكەدا كە رۆژی یەكشەمە 18ی 1ی 2026 بەڕێوەچوو، ئاڵوگۆڕی بیروڕا كرا لە بارەی پێكهێنانی هەر دوو حكومەتی نوێی هەرێم و حكومەتی نوێی فیدراڵ. 
لەم چوارچێوەیەدا قوباد تاڵەبانی جەختی كردەوە كە دەبێت ئەولەوییەتی هەر دوو حكومەتی داهاتووی هەرێم و فیدراڵ چارەسەركردنی كێشەكانی نێوانیان بێت و پێكەوە كار بكەن بۆ گەشەپێدانی ئابووری عیراق و كوردستان.

لە بەشێكی دیكەی كۆبوونەوەكەدا باس لە دۆخی سوریا كرا. لەمبارەیەشەوە قوباد تاڵەبانی نیگەرانی خۆی لەپەرەسەندنی شەڕ و ئاڵۆزییەكانی نێوان هێزەكانی سوریای دیموكرات و حكومەتی سوریا دەربڕی و رایگەیاند: پێویستە كۆمەڵگای نێودەوڵەتی هەوڵی جدی بدات بۆ هێوركردنەوەی دۆخەكە و هەنگاوی جدیش بنێن بۆ دابینكردن و گەرەنتیكردنی مافەكانی كورد لە چوارچێوەی سوریایەكی سەربەخۆ و دیموكراتیدا.

PUKMEDIA