عومەر شێخ موس: بارودۆخی ناوچەكە یەكبوونی زیاتر لەكورد دەخوازێت

راگەیاندنی مەكتەبی پەیوەندییەكان/ پەیوەندییە كوردستانییەكانی یەكێتی

سەردانی پارتی وڵاتپارێزی باكوری كوردستان بۆ مەكتەبی پەیوەندییەكان/ پەیوەندییە كوردستانییەكانی یەكێتی

پارتی وڵاتپارێزی باكوری كوردستان بە سەرۆكایەتی مستەفا ئۆزجەلیك، سەرۆكی پارتەكە، سەردانی مەكتەبی پەیوەندییەكان/ پەیوەندییە كوردستانییەكانی یەكێتی-یان كردو  لەلایەن عومەر شێخ موس، سیاسەتمەداری كوردو ئەندامی دەستەی دامەزرێنەری یەكێتییەوە پێشوازیان لێكرا.

لە كۆبوونەوەكە رەوشی رۆژئاڤای كوردستان و هەڵگرتنی بەربەستەكانی بەردەم پڕۆسەی ئاشتی لەتوركیا و باكوری كوردستان گفتوگۆیان لەبارەوە كراو عومەر شێخ موس رایگەیاند: بارودۆخی ناوچەكەو  گۆڕانكارییەكان،  یەكبوونی زیاتر لەكورد دەخوازێت.

 وتیشی: پێشهاتەكان لەباكوری كوردستان كاریگەریان لەسەر هەموو بەشەكانی دیكەی كوردستان دەبێت.
هاوكات مستەفا ئۆزجەلیك، رۆڵی سەرۆك مام جەلالی بەرزنرخاند كە پاڵپشت و هاوكار بووە بۆ هەستانەوەی كورد لە هەموو قۆناغە سەختەكاند و ئەندازیاری سەرهەڵدانەوەی خەباتی رزگاریخوازی گەلی كورد بووە.

لایخۆشیەوە سالار سەرحەد، ئەندامی سەركردایەتی و لێپرسراوی پەیوەندییە كوردستانییەكانی یەكێتی وتی: یەكێتیی نیشتمانیی كوردستان بە پابەندبوون بەسیاسەتی چەپكە گوڵەكەی سەرۆك مام جەلال، پەیوەندیی بەهێزمان لەگەڵ سەرجەم پارتە سیاسییەكانی باكوری كوردستان هەیە كە خەبات دەكەن بۆ بەدەستهێنانی مافی گەلی كورد لەتوركیا بەڕێگەی چارەسەری ئاشتیانە، یەكێتیش وەك هەمیشە هاوكار و پشتیوان دەبێت بۆ سەرخستنی پڕۆسەی ئاشتی لە توركیا و باكوری كوردستان.

PUKMEDIA