رێکەوتێکی سەیری مام جەلال و صەدام

سەعدی ئەحمەد پیرە

سەعدی ئەحمەد پیرە

رێکەوتێکی سەیر بوو بەمانای ووشە . لەکاتێکدا وڵاتانی ئەوروپا و رێکخراوی سوشیال ئەنتەرناشنالی نێودەوڵەتی ئامادەکارییان دەکرد، بۆ بەخشینی گەورەترین خەڵاتی رێزلێنانی خۆی بە هەڤاڵ مام جەلال وەکو ئەندامێکی کارای رێکخراوی سۆسیال دیموکراتی نێودەوڵەتی ، لەولاوە هاوپەیمانی 32 وڵاتانی دونیا بە سەدان فڕۆکە و مووشەک و تۆپی قوڕسەوە ئاگربارانی رژێمی صەدام حوسینیان دەکرد لەسەرتاسەری عیراقدا .

لەشەوی17/18 مانگی کانونی دووەەمی ساڵی 1991 وەک ئەمڕۆ لەکاتێکدا هۆڵێک لە پایتەختی نەمسا بە گوڵوگوڵزار و گڵۆپی رەنگاوڕەنگ دەڕازێندرایەوە بۆ پێشوازی لە سەرکردەی نەتەوەیی و رەمزی موقاوەمەی عیراقی و سەرۆکی یەکێتیی نیشتمانیی کوردستانی نەیاری سەرسەختی دیکتاتۆرییەتی صەدام ، لە بەغدای پایتەختیش سەرۆکەکەی کونەمشکی لێببووە قەیسەری و نەیدەزانی سەر بەکوێ بکات، لە ترسی مووشەکی فڕۆکەکانی هاوپەیمانان .

بۆ ئەوەی وەکو سەرکردەیەکی مەیدانی لە نێزیک بەرەکانی شەڕدا بمێنێتەوە و چاودێری دۆخی وڵاتەکەی بکات ، ئەو رۆژە مام جەلال نەیتوانی خۆی ئامادەی ئەو ئاهەنگە بێت و لەتەک گەورەترین سەرکردە و سەرۆکانی وڵاتانی سۆسیالیست خەڵاتە بەنرخەکەی وەربگرێت، بۆیە هەر لە دیمەشقەوە بە بروسکە ئاگاداری کردمەوە، کە بە نمایندەیی خۆی خەڵاتەکەی( کرایسکی ) وەربگرم، کە ئەم متمانەیەش شانازییەکی گەورەبوو بۆ من .

ئێمەی یەکێتی قەت مام جەلالمان تەنها بە موڵکی یەکێتی نەزانیوە ، مێژوو شاهێدە ئەو پیاوە مەزنە کەسایەتییەکی جیهانی و رابەڕێکی نەتەوەیی بێ وێنە بووە .

سەرکردەیەکی گەورەی هێزەکانی ئۆپۆسزیۆنی عیراقی بووە . دیبلۆماتکارێکی کارامە و لێزان بووە . ئەم سیفاتانەی وایکردووە بۆ یەکەمجار لە مێژووی عیراقدا کۆدەنگی کورد و عەرەب و تورکمان و مەسیحی ، ئێزیدی وصابئی ، ئیسلامی وعەلمانی ، شیعە و سوننە ، هەموو پێکهاتەکانی عیراق و کوردستان یەکبن بۆ ئەوەی ببێتە سەرۆکی عیراق لە بارودۆخێکی زۆر سەخت و دژواردا کە عیراق کەوتبووە ناو گێژاوی شەڕی ئەهلییەوە . بەڵام حیکمەتی مام جەلال ئاگرەکەی کوژاندەوە و بە حەق بووە ( صمام أمان )ی عیراق .

ئەوەتا لەوەتەی جەنابیان رەوانی شاد بووە و ئەم وڵاتەی بەجێهێشتووە، تا ئەمڕۆش عیراق کەسایەتییەکی هاوشانی کاریزمایی مام جەلالی بە خۆیەوە نەبینیوە. ئەمەش حەقیقەتێکە کەس ناتوانێ نکوڵی لێ بکات . مام جەلالێکی تر قەت قەت دووبارە نابێتەوە .

PUKMEDIA