حکومەتی سوریا چەکداری زیاتر رەوانەی دێر حافر دەکات

روانگەی سوری

چەکدارانی حکومەتی دیمەشق ئامادەکاری بۆ هێرش دەکەن

حکومەتی سوریا هێزی چەکداری زیاتری بۆ سنووری دێرحافر گواستووەتەوە و روانگەی سوریش رایدەگەیەنێت چەکدارەکان لە ناوچەی جەبلە و لازقییەوە گواسراونەتەوە وەک ئامادەکارییەک بۆ ئەنجامدانی ئۆپراسیۆن دژی هێزەکانی هەسەدەیە.

روانگەی سوری بۆ مافەکانی مرۆڤ رایگەیاند: حکومەتی کاتی  سوریا هێزی سەربازی نوێی گواستوەتەوە بۆ سنوری دێرحافر و لە لادێکانی رۆژهەڵاتی حەلەب بەرانبەر هێزەکانی هەسەدە جێگیرکراون، ئەمەش وەک ئامادەکارییەکە بۆ هێرشکردنە سەر ئەو ناوچانەی لە ژێر دەسەڵاتی هەسەدەدایە.

سەرچاوەکان ئەوەیان روونکردووەتەوە: ئەو هێزانە پڕچەکن و لە ناوچەی لازقیە و جەبلەوە هێنراون،  هێنانی ئەو هێزانە هاوکاتە لەگەڵ بەهێزکردنی پێگە سەربازییەکان و پەرەسەندنی ئۆپەراسیۆنە مەیدانییەکان لەو سنوورە.

لەلایەکی دیکەوە، شەوی رابردوو گرژی و پێکدادان لە نێوان هێزەکانی هەسەدە و چەکدارانی سەر بە سوپای تورکیا لە چەند بەرەیەکدا رویدا، هەسەدە رایگەیاند دوێنێ شەو و بەرەبەیانی ئەمڕۆ بە درۆنی تورکیا دوو بنکەیان کراونەتە ئامانج.

 ئەمەش لەکاتێکدایە، رۆژی 6ی1ی2026، چەکدارانی سەر بە حکومەتی دیمەشق هێرشیان کردە سەر گەڕەکی ئەشرەفییە و شێخ مەقسود و دوای بەرگرییەکی بێوێنەی  ئەندامانی هێزەکانی ئاسایشی ناوخۆ، گروپە چەکدارەکان ئەو دوو گەڕەکەیان کۆنترۆڵ کرد و چەندین تاوانیشیان ئەنجامدا.

PUKMEDIA