هێزەکانی ئاسایشی ناوخۆ لە شێخ مەقسود بەرپەرچی چەکدارەکان دەدەنەوە

روانگەی سوری

هێرشی چەکدارەکان بۆ سەر گەڕەکە کوردییەکان بەردەوامە

سوپای عەرەبیی سوریا رایگەیاند کۆنترۆڵی گەڕەکی شێخ مەقسودیان لە حەلەب کردووە، بەڵام هێزەکانی ئاسایشی ناوخۆ رەتیدەکەنەوە گەڕەکەکە کۆنترۆڵ کرابێت و هێرشی چەکدارەکان تێکدەشکێنن.

دەستەی ئۆپەراسیۆنەکان لە سوپای عەرەبیی سووریا رایگەیاند، ئۆپەراسیۆنی گەڕەکی شێخ مەقسوودیان لە شاری حەلەب بە تەواوەتی کۆتایی پێهێناوە و سەربازەکانیان بڵاوەپێکردووە.

هاوکات چەکدارەکانی سەر بەدیمەشق گەیشتوونەتە ناو نەخۆشخانەی شەهید خالید فەجر لە شێخ مەقسوود و کۆنترۆڵیان کردووە.

 لەلایەکی دیکەوە، هێزەکانی ئاسایشی ناوخۆ، رەتیدەکەنەوە گەڕەکەکە لەلایەن چەکدارەکانەوە کۆنترۆڵ کرابێت، ئاژانسی هەواڵەکانی هاوار ئاشکرای کرد کە چەکدارەکان لە حی زهورەوە ویستویانە دزە بکەنە ناو گەڕەکی شێخ مەقسود، بەڵام هێزەکانی ئاسایشی ناوخۆ بەرپەرچیان داونەتەوە و زیانی زۆریان پێگەیاندوون.

دەشڵێت: چەکدارەکان پاشەکشەیان کردووە و بەسێ ئۆتۆمبێلی فریاگوزاری تەرمی چەکدارەکانیان گواستووەتەوە.

هاوکات لەسێ میحوەرەوە شەڕو پێکدادان بەردەوامە و هێزەکانی ئاسایشی ناوخۆ توانیویانە سێ فڕۆکەی بێفڕۆکەوان تێکبشکێنن.

پەیوەست بە ئاماری قوربانییەکان، روانگەی سوری بۆ مافەکانی مرۆڤ ئاشکرای کرد، تاوەکو ئێستا 62 کەس بوونەتە قوربانی، کە 37 کەسیان هاووڵاتی سڤیلن و کە 7 ژن و 5 منداڵ لە ناو قوربانییەکانن، هاوکات 115 کەسی دیکەش بریندار بوون.

 روانگەی سوری ئاماژەی بەوەشکردووە تاوەکو ئێستا 25 چەکدار کوژراون و یەک کارمەندی هێزەکانی ئاسایشی ناوخۆش گیانی لەدەستداوە.

PUKMEDIA