دەرباز کۆسرەت رەسوڵ: بۆ بەدیهێنانی مافی گەلەکەمان پێویستمان بە یەکڕیزییە

نوسینگەی رۆژنامەوانی دەرباز کۆسرەت رەسوڵ

دەرباز کۆسرەت رەسوڵ و یان برایم

ئەمڕۆ 7ی1ی2026 دەرباز كۆسرەت رەسوڵ ئەندامی مەكتەبی سیاسیی و لێپرسراوی مەكتەبی پەیوەندییەكانی یەكێتیی نیشتمانیی كوردستان، لە بارەگای مەكتەبی سیاسی لە شاری هەولێر، پێشوازیكرد لە (یان برایم) كونسوڵی گشتیی فەرەنسا لە هەرێمی كوردستان. 

لە دیدارەكەدا باس لەبارودۆخی ناوچەكەو پێشهاتە سیاسییەكان كرا، گفتوگۆكانی پێكهێنانی حكومەتی هەرێم و عیراق بە گرنگییەوە باسی لێوەكرا و یەكڕیزی نێوان هێزو لایەنە سیاسییەكانی هەرێم دووپاتكرایەوە، هاوکات دەرباز كۆسرەت رەسوڵ رایگەیاند: بەرپرسیارێتی گەورەو دەرفەتمان لەپێشە، پێویستمان بەوەیە بەیەكڕیزی لەناوخۆو دەرەوە كاربكەین بۆ بەدیهێنانی مافە ڕەواكانی گەلەكەمان.

دەرباز كۆسرەت رەسوڵ هەڵوێستی یەكێتیی نیشتمانیی كوردستانی لەبارەی دۆخی عیراق خستەڕوو كەجەخت لەسەر چوارچێوە دەستووریی و یاساییەكان دەكاتەوە بۆ تێپەڕاندنی ئالنگارییەكان، باشتركردنی باردۆخی هاونیشتمانیان و دەستەبەركردنی حكومڕانی تەندروست.

دەرباز كۆسرەت رەسوڵ و كونسوڵی گشتی فەرەنسا دۆخی سوریاو پێشهاتەكانی ناوچەكەیان خستە بەرباس، جەخت لە پاراستنی مافە ڕەواكانی گەلی كورد لە سوریا كرایەوە، بەپێویست زانرا كۆمەڵی نێودەوڵەتی بەوردی چاودێری بارودۆخی سوریا بكات. 

پاراستنی پەیوەندی بنیاتنەرانە لەگەڵ هاوبەشە نێودەوڵەتییەكان، بۆ پاراستنی سەقامگیری و گەشەپێدان بۆ بەرژەوەندی هەموو هاووڵاتیان لە عیراق و هەرێمی كوردستان، دووپاتكرایەوە.

PUKMEDIA