كۆمیسیۆنی فریاگوزاری چه‌مچه‌ماڵ: 120 هه‌زار دۆلارو نزیكه‌ی 6 ملیار دینارمان به‌ده‌ستگه‌یه‌شتووه‌

PUKMEDIA

کۆنگرەی رۆژنامەوانی عه‌تا محه‌مه‌د لێپرسراوی كۆمیسیۆنی فریاگوزاری و بوژاندنه‌وه‌ی چه‌مچه‌ماڵ

له‌ماوه‌ی چه‌ند رۆژی رابردوودا بڕ‌ی 120 هه‌زار دۆلار و 5 ملیار و 746 ملیۆن دینار بۆ قه‌ره‌بووكردنه‌وه‌ی چه‌مچه‌ماڵ له‌لایه‌ن خێرخوازانه‌وه‌ نێردراوه‌ بۆ كۆمیسیۆنی فریاگوزاری و بوژاندنه‌وه‌ی چه‌مچه‌ماڵ و سبه‌ینێش دوایین راپۆرت له‌سه‌ر زه‌ره‌ر و زیانه‌كانی لافاوه‌كه‌ی چه‌مچه‌ماڵ و چۆنێتی میكانیزمی قه‌ره‌بووكردنه‌وه‌ی بڵاوده‌كرێته‌وه‌.

عه‌تا محه‌مه‌د لێپرسراوی كۆمیسیۆنی فریاگوزاری و بوژاندنه‌وه‌ی چه‌مچه‌ماڵ له‌كۆنگره‌یه‌كی رۆژنامه‌وانیدا رایگه‌یاند: سوپاسی رێكخراوی مانگی سوور ده‌كه‌ین بۆ هاوكاریمان و بۆ ئه‌وه‌ی ئاماره‌كان به‌ شه‌فافانه‌ بگاته‌ به‌رده‌ست هه‌موو لایه‌ك، رایده‌گه‌یه‌نین كه‌ له‌دوای رووداوی لافاوه‌كه‌ی چه‌مچه‌ماڵ هه‌تا ئێستا بڕ‌ی 6 هه‌زار و 450 سه‌به‌ته‌ی خۆراك دابه‌شكراوه‌، له‌گه‌ڵ 5 هه‌زار و 500 ژه‌م خواردنی گه‌رم.

وتیشی: هاوكات 134 هه‌زار و 700 مه‌تر چوارگۆشه‌ كومبار و 2 هه‌زار و 402 زۆپاو 3 هه‌زار و 100 پاكێجی پاكه‌ره‌وه‌و 20 هه‌زار و 914 پارچه‌ به‌تانی و سه‌رین و لێفه‌ و 8 هه‌زارو 850 پارچه‌ راخه‌ر و دۆشه‌كو هه‌زار و 500 سێتی مه‌تبه‌خ و 5 هه‌زار و 845 پارچه‌ جل و به‌رگ و 150  جانتای منداڵان دابه‌شكراون.

له‌باره‌ی هاوكاری مادییه‌وه‌ كه‌به‌ده‌ستیان گه‌یشتووه‌ به‌رپرسی كۆمیسیۆنی فریاگوزاری و بوژاندنه‌وه‌ی چه‌مچه‌ماڵ وتی: بڕ‌ی 5 ملیار و 746 ملیۆن دینار داغڵی ژماره‌ حسابی بانكی چه‌رمۆ كراوه‌ له‌گه‌ڵ 120 هه‌زار دۆلار داغڵی بانكی چه‌رمۆ و جیهان كراوه‌و به‌ڵێنی زیاتریش دراوه‌، به‌ڵام هێشتا نه‌خراونه‌ته‌ سه‌ر هه‌ژماره‌كان.

ئه‌وه‌شی وت: له‌چوارچێوه‌ی داشبۆردی شه‌فافیه‌ت په‌ڕ‌ه‌یه‌كی ئه‌لكترۆنی دروست ده‌كه‌ین و سه‌رجه‌م ئاماره‌كان له‌وێ رۆژانه‌ راده‌گه‌یه‌نین و نوێ ده‌كرێته‌وه‌، هاوكات ناوی به‌خشه‌ره‌كان له‌ناو داشبۆرده‌كه‌ راده‌گه‌یه‌نرێت، به‌پێی ویستی به‌خشه‌ره‌كان و هه‌ركه‌سیش پێی خۆشنه‌بوو ناوی بڵاو بكرێته‌وه‌، به‌به‌خشه‌رێك تۆمار ده‌كرێت.

له‌كۆتایی قسه‌كانیشیدا ئه‌وه‌ی راگه‌یاند: سبه‌ینێ دوایین راپۆرت له‌سه‌ر زه‌ره‌ر و زیانه‌كانی لافاوه‌كه‌ی چه‌مچه‌ماڵ بڵاوده‌كه‌یه‌نه‌وه‌، له‌گه‌ڵ چۆنێتی میكانیزمی قه‌ره‌بووكردنه‌وه‌.

PUKMEDIA